Վարչապետն առաջարկեց գարնանացանի ավելացած սերմացուն բաժանել գյուղացիներին

ԵՐԵՎԱՆ, 14 ՕԳՈՍՏՈՍԻ, ԱՐՄԵՆՊՐԵՍ։ Հայաստանի հողօգտագործողների համար ներկրված գարնանացան գարու, եգիպտացորենի, առվույտի և կորնգանի սերմացուների ավելցուկ է արձանագրվել: Այս մասին ՀՀ կառավարության նիստի ժամանակ հայտարարեց Գյուղատնտեսության նախարար Սերգո Կարապետյանը՝ նշելով, որ թեև Կառավարարությունն այս տարի ավելի քիչ ծավալով սերմացու է ներկրել, սակայն գյուղացիների մոտ այդ ծավալի պահանջարկ չի եղել։ Նա առաջարկեց ավելացած սերմացուն տրամադրել մարզպետարաններին՝ գարնանը գյուղացիներին բաժանելու համար։ «Սերմացուն կտրամադրվի մարզպետարաններին՝ Գյուղատնտեսության նախարարության «Սերմերի գործակալություն» պետական ոչ առևտրային կազմակերպության միջև կնքված պայմանագրի հիման վրա։ Ըստ մարզպետարանների ներկայացրած պահանջարկի՝ նախատեսվում էր 2014 թվականի գարնանն արտերկրից ներմուծել շուրջ 1978 տոննա գարնանացան գարու առաջին վերարտադրության,շուրջ 168 տոննա կապույտ առվույտի, մոտ 189 տոննա կորնգանի և 23.5 տոննա եգիպտացորենի սերմացու, իսկ տեղական սերմարտադրողներից գնել 150 տոննա էլիտային վերարտադրության գարնանացան գարու սերմացու: Ծրագրի իրականացման ընթացքում պարզ է դարձել, որ մարզպատարաններից ներկայացված սերմացուների պահանջարկը իրատեսական չէ և ներկրված սերմացուները չեն իրացվում»,- «Արմենպրես»-ի հաղորդմամբ՝ ասաց նախարարը։

Վարչապետ Հովիկ Աբրահամյանը չհամաձայնեց նախարարի առաջարկին և հանձնարարեց սերմացուն բաժանել գյուղացիներին։ «Հիմա մենք սերմացուն տալիս ենք մարզպետարաններին, որ ի՞նչ անեն: Իրենք իրավունք ունե՞ն բաժանել սերմը: Իմ կարծիքով՝ ճիշտ կլինի հետևեք, որ այդ սերմը հիմա մարզպետարանները բաժանեն գյուղացիներին: Եթե պիտի մնա և փչանա, ավելի լավ է տան գյուղացիներին, նրանք օգտագործեն»,- ասաց վարչապետը։

Այս տարի հանրապետություն էր ներկրվել 1906.3 տոննա գարնանացան գարու առաջին վերարտադրության,168.35 տոննա կապույտ առվույտի, 169.96 տոննա կորնգանի և 23.44 տոննա եգիպտացորենի սերմացու, իսկ տեղական սերմարտադրողներից գնվել էր 150 տոննա էլիտային վերարտադրության գարնանացան գարու սերմացու: