2 րոպեի ընթերցում
ԵՐԵՎԱՆ, 24 ՀՈՒԼԻՍԻ, ԱՐՄԵՆՊՐԵՍ: Հայաստանում քաղաքական օրակարգը ձևավորված է, ու այն ձևավորողն ու քաղաքական լոկոմոտիվը ազդեցիկ քաղաքական ուժերն են: Այսպիսի տեսակետ արտահայտեց ՀՀԿ խոսնակ Էդուարդ Շարմազանովը` անդրադառնալով ՀՀ առաջին նախագահ Լևոն Տեր-Պետրոսյանի վերջին հարցազրույցում բարձրացված հարցերից մեկին: «Չեմ կարծում, որ ինքն ու իր քաղաքական թիմն այն ուժն է, որը թելադրում է Հայաստանում քաղաքական օրակարգ: Ինքն ու իր ղեկաված քաղաքական ուժը մեծ ցանկության դեպքում էլ իրենց դաշնակիցների մոտ ազդեցիկ դժվար թե համարվեն: Դրա համար է այն վերածվել այլ քաղաքական ուժերի վերջին վագոնի»,- ընդգծեց Էդուարդ Շարմազանովը:
Ինչ վերաբերում է այն դիտարկմանը, թե Հայաստանի ԵՏՄ-ին անդակմացության համար խոչընդոտ է ՀՀ-ի և ԼՂՀ-ի միջև մաքսակետերի տեղադրման հարցը, Շարմազանովն ասաց. «Այս թեմայով նոր բան չկա. մեր պետական ներկայացուցիչները հստակ պատասխաններ տվել են արդեն: Մենք ասել ենք, որ Մաքսային միությանն անդամակցությունը բխում է մեր պետության շահերից, և Լեռնային Ղարաբաղի ժողովրդի ու պետության անվտանգությունը մեզ համար գերակա խնդիր է: Հայաստանի Հանրապետությունը` որպես ԼՂ Հանրապետության ու ժողովրդի անվտանգության երաշխավոր, ամեն ինչ անելու է, որպեսզի խաղաղ բանակցությունները ավարտվեն ԼՂՀ դե յուրե ճանաչմամբ»: