Կյանքից հեռացել է նկարիչ և դերասան Ռաֆայել Աթոյանը

ԵՐԵՎԱՆ, 7 ՀՈՒԼԻՍԻ, ԱՐՄԵՆՊՐԵՍ: Կյանքի 84-րդ տարում Ֆրեզնոյում վախճանվել է ՀԽՍՀ վաստակավոր նկարիչ, դերասան Ռաֆայել Աթոյանը: Այս մասին«Արմենպրես»-ին տեղեկացրին ՀՀ մշակույթի նախարարության հասարակայնության հետ կապերի բաժնից:

Ռ. Աթոյանը ծնվել է 1931թ. հունվարի 31-ին` Լենինականում (Գյումրի): 1944-46թթ. սովորել է տեղի Մերկուրովի անվան գեղարվեստի դպրոցում, 1948-53թթ.` Երևանի Փ. Թերլեմեզյանի անվան գեղարվեստի ուսումնարանում, 1954-59թթ.` Երևանի գեղարվեստաթատերական ինստիտուտի գեղանկարչության ֆակուլտետում:

Ռ. Աթոյանը հեղինակել է մի շարք բնանկարներ, նատյուրմորտներ, որմնանկարներ: Նրա դեղնադարչնագույն կոլորիտով նկարների հենքը Շիրակի լեռնաշխարհն է` «Աղջիկները բակում» (1975թ.), «Ձիակառք ճերմակ ձիերով» (1978թ.), «Կինը և ծառը» (1978թ.), «Խնոցի» (1980թ.) և այլն:

Նկարահանվել է «Մենավոր ընկուզենի» (1987թ.),«Կարոտ» (1990թ.) կինոնկարներում: Վերջինում մարմնավորել է գլխավոր հերոս Առաքելի կերպարը:

ՀՀ մշակույթի նախարարության աջակցությամբ, Հայաստանի ազգային պատկերասրահում 2011թ.բացվել է Ռ. Աթոյանի ծննդյան 80-ամյա և ստեղծագործական գործունեության 50-ամյա հոբելյաններին նվիրված անհատական ցուցահանդեսը, որտեղ վարպետին հանձնվել է ՀՀ մշակույթի նախարարության Ոսկե մեդալ:

Նա 1991 թվականից բնակվել է ԱՄՆ Ֆրեզնո քաղաքում, որտեղ և կնքել է իր մահկանացուն: