ՄԻՊ-ը մտահոգություն է հայտնել Սարյան փողոցում ցույցարարների և ոստիկանների բախումների առնչությամբ

ԵՐԵՎԱՆ, 24 ՀՈՒՆԻՍԻ, ԱՐՄԵՆՊՐԵՍ: ՀՀ մարդու իրավունքների պաշտպանն արձագանքել է Հանրային ծառայությունները կարգավորող հանձնաժողովի շենքի մուտքի առջև էլեկտրաէներգիայի սակագնի բարձրացման դեմ բողոքող ցուցարարների և ոստիկանության աշխատակիցների միջև հունիսի 24-ին տեղի ունեցած բախումներին: «Արմենպրես»-ի հաղորդմամբ` ՄԻՊ աշխատակազմի տարածած հաղորդագրության մեջ ասված է.

«Մեր անհանգստությունն ենք հայտնում երեկ Սարյան փողոցում տեղի ունեցած իրադարձությունների կապակցությամբ:Ոստիկանի կողմից հասարակական կարգ պահպանելը չի նշանակում ծեծել քաղաքացիներին, իսկ պաշտոնեական պարտականությունները կատարելիս սեփական հույզերով առաջնորդվելը վկայում է ցածր պրոֆեսիոնալիզմի մասին: Հետևաբար, համարժեք քայլեր ենք ակնկալում հավաքի մասնակիցների վրա անհամաչափ ուժ կիրառած բոլոր ոստիկանների նկատմամբ:

Միաժամանակ, հավաքի որոշ մասնակիցներ ևս անթույլատրելի վարքագիծ են դրսևորել: Լրատվամիջոցներում տարածված մի շարք տեսանյութերում երևում է, թե ինչպես են նրանցից ոմանք կոպիտ կերպով վիրավորում կամ հրում ոստիկաններին: Մարդու իրավունքի իրացումը չի ենթադրում ամենաթողություն, հակաիրավական պահվածք և անհարգալից վերաբերմունք իրավապահների հանդեպ:

Մարդու իրավունքների պաշտպանը տեղի ունեցածին ամբողջական գնահատական կտա ոստիկանության կողմից ըստ օրենքի անհրաժեշտ պաշտոնական պարզաբանումները ստանալուց հետո»:

Հունիսի 23-ին Հանրային ծառայությունները կարգավորող հանձնաժողովի դիմաց մի խումբ քաղաքացիներ բողոքի ակցիա անցկացրին էլեկտրաէներգիայի սակագնի բարձրացման դեմ: Քաղաքացիների պահանջները երկուսն էին՝ չթանկացնել էլեկտրաէներգիայի սակագինը և սահմանել գնագոյացման հստակ մեխանիզմ:

ՀՀ հանրային ծառայությունները կարգավորող հանձնաժողովն իր նախաձեռնությամբ սկսել է էլեկտրաէներգիայի արտադրության և ծառայությունների մատուցման, ինչպես նաև վերջնական սպառողներին վաճառվող էլեկտրաէներգիայի սակագների վերանայման գործընթացը: ՀՀհանրային ծառայությունները կարգավորող հանձնաժողովի նախնական գնահատմամբ՝էլեկտրաէներգետիկական համակարգի ընկերությունների ֆինանսական կայունության ևսպառողներին հուսալի ու անվտանգ էլեկտրամատակարարման ապահովման նպատակովանհրաժեշտ է շուրջ 20 մլրդ դրամ (առանց ԱԱՀ-ի) լրացուցիչ գումար: Ընկերություններումառաջացող ֆինանսական ճեղքվածքը փակելու համար նախատեսվում է բոլոր սպառողականխմբերին մատակարարվող էլեկտրաէներգիայի գործող սակագների բարձրացում` 3,8-4,3 դրամ/կՎտժ-ի (ներառյալ ԱԱՀ-ն) սահմաններում: