2 րոպեի ընթերցում
ԵՐԵՎԱՆ, 9 ՀՈՒՆԻՍԻ, ԱՐՄԵՆՊՐԵՍ: Ազգային ժողովի փակ քվեարկությամբ Սահմանադրական դատարանի անդամ է նշանակվել Արայիկ Թունյանը: Այս մասին քվեարկության ավարտից հետո տեղեկացրեց ՀՀ ԱԺ ժամանակավոր հաշվիչ հանձնաժողովի նախագահ Սուքիաս Ավետիսյանը: «Քվեարկությանը մասնակցել է 68 պատգամավոր, որոնցից 3-ը դեմ են քվեարկել, իսկ 65-ը` կողմ Արայիկ Թունյանի թեկնածությանը»,- «Արմենպրես»-ի հաղորդմամբ՝ ասաց Ավետիսյանը:Նա հայտարարեց, որ ավարտված քվեարկության արդյունքներով` Արայիկ Թունյանը նշանակվել է Սահմանադրական դատարանի անդամ:
ՀՀ ԱԺ նախագահ Գալուստ Սահակյանը Թունյանին համարում է որակյալ կրթություն ստացած անձնավորություն և, ըստ նրա, ամենակարևորն այն է, քաղաքականացված չէ: «Ես անձամբ ճանաչում եմ Արայիկ Թունյանին, գիտեմ նրա որակները և ես եմ առաջարկել նրա թեկնածությունը: Դուք տեսաք, որ նա քաղաքականացված չէ, քանի որ երբ մարդը քաղաքականացված է լինում, ելևեջներով է պատասխանում պատգամավորների հարցերին, իսկ Թունյանը շատ հանգիստ ու գրագետ պատասխաններ տվեց»,- ասաց Սահակյանը:
Հարցին, թե արդյոք ՀՀ նախագահ Սերժ Սարգսյանի պահանջով չէ՞ ինքն առաջարկել Թունյանի թեկնածությունը, Գալուստ Սահակյանը նշեց, որ դրանք բամբասանքներ են: «Բնականաբար, ես մեր կուսակցության գործադիր մարմնում որոշակիորեն ներկայացրել եմ նաև իմ տեսակետը, ուստի չի կարելի վերցնել ու նյութ չունենալու պատճառով սկսել փորփրել ինչ-որ բաներ, որոնք անհեթեթություններ են»,- ասաց Սահակյանը:
ՍԴ անդամի թափուր պաշտոնի համար ՀՀ ԱԺ նախագահ Գալուստ Սահակյանը առաջարկել էր Արայիկ Թունյանի թեկնածությունը: Թունյանը ՍԴ-ում կփոխարինի նախկին անդամ Վալերի Պողոսյանին, ում լիազորությունները դադարել են: