2 րոպեի ընթերցում
ԵՐԵՎԱՆ, 2 ՀՈՒՆԻՍԻ, ԱՐՄԵՆՊՐԵՍ: Հայաստանի Հանրապետության արդարադատության նախարար Հովհաննես Մանուկյանն այսօր` հունիսի 2-ին, ընդունել է Բրիտանական խորհրդի հայաստանյան գրասենյակի տնօրեն Արևիկ Սարիբեկյանին: Ինչպես «Արմենպրես»-ին տեղեկացրին ՀՀ արդարադատության նախարարության տեղեկատվության եւ հասարակայնության հետ կապերի բաժնից, հանդիպմանը քննարկվել են հունիսի 3-ին տեղի ունենալիք ԵՄ «Աջակցություն Հայաստանում ժողովրդավար կառավարման գործընթացին» ծրագրի մանրամասները:
Արևիկ Սարիբեկյանը նախարարին է ներկայացրել ծրագրի նպատակը, այն է՝ աջակցել հասարակական կազմակերպությունների գործունեության համար իրավական և ֆինանսական կայուն համակարգի ստեղծմանը, հասարակական կազմակերպությունների կարողությունների և լրատվամիջոցների մասնագիտական հմտությունների բարելավմանը, ինչպես նաև հասարակական կազմակերպությունների, լրատվամիջոցների, կառավարության և Եվրամիության միջև երկխոսության և համագործակցության դյուրացմանը:
Հովհաննես Մանուկյանը դրական է գնահատել Բրիտանական խորհրդի հետ ՀՀ արդարադատության նախարարության համագործակցության առաջին քայլերը և հույս հայտնել, որ այն շարունակական կլինի: «Աջակցություն Հայաստանում ժողովրդավար կառավարման գործընթացին» ծրագիրն իրականացվում է Բրիտանական խորհրդի կողմից՝ իր գործընկերներ «Թոմսոն» հիմնադրամի, «Քաղաքացիական զարգացման և համագործակցության» հիմնադրամի և «Գրանտ Թորնթոն»-ի հետ համատեղ: