1 րոպեի ընթերցում
ՄՈՍԿՎԱ, 25 ԱՊՐԻԼԻ, ԱՐՄԵՆՊՐԵՍ: Ռուսաստանի Դաշնության Արտակարգ իրավիճակների նախարարության ինքնաթիռն ապրիլի 23-ին սիրիական Լաթաքիա քաղաք է տեղափոխել 34 տոննա անհապաղ մարդասիրական օգնություն` շարժական էլեկտրական սարքեր, հագուստ, սնունդ, վրաններ, վերմակներ, կենցաղային պարագաներ: Ինչպես հաղորդում է «Արմենպրես»-ը` վկայակոչելով ՌԴ արտաքին գործերի նախարարության կայքը, օգնության մի մասը հավաքել է Ռուսաստանի հայկական սփյուռքը և նպատակաուղղված է մասնավորապես Քեսաբ քաղաքից տեղահանված հայ բնակչության համար: Նրանք մարտի վերջին հարձակման էին ենթարկվել ծայրահեղականների կողմից, տեղահանվել ու ապաստանել էին Լաթաքիայում:
Սիրիացիներին օգնություն տեղափոխած ինքնաթիռը Մոսկվա վերադառնալիս իր հետ բերել է նաև սիրիական կողմի նվերը` 20 տոննա նարինջ, որը կբաժանվի մայրաքաղաք Մոսկվայի և Մոսկվայի մարզի մանկատներին:
Նշվում է, որ Ռուսաստանի Դաշնությունը կշարունակի անհարժեշտ օգնություն տրամադրել Սիրիայի խաղաղ բնակիչներին, ինչպես նաև Սիրիայից հարևան երկրներ գաղթած փախստականներին: