Զինվորի մահվան կապակցությամբ հարուցվել է քրեական գործ

ԵՐԵՎԱՆ, 20 ՄԱՐՏԻ, ԱՐՄԵՆՊՐԵՍ: Ղարաբաղա-ադրբեջանական հակամարտ զորքերի շփման գծի հյուսիսային ուղղությամբ տեղակայված զորամասերից մեկի պահպանության տեղամասի մարտական հենակետում զինծառայողի մահվան և սպայի վիրավորվելու փաստի առթիվ քրեական գործ է հարուցվել: «Արմենպրես»-ի հետ զրույցում ՊՆ քննչական ծառայության լրատվության հետ կապերի սպա Մերի Սարգսյանը տեղեկացրեց, որ քրեական գործը հարուցվել է ՀՀ քրեական օրենսգրքի 365 հոդվածի 3-րդ մասի` «մարտական հերթապահություն կամ մարտական ծառայություն կրելու կանոնները խախտելը, որն առաջացրել է ծանր հետևանքներ» հատկանիշներով:

Մարտի 20-ին ԼՂՀ ՊԲ զորամասերից մեկում մարտական խնդիր կատարելու ժամանակ մահացու հրազենային վիրավորում է ստացել զինծառայող, 1994թ. ծնված Արման Արտյուշայի Ղուկասյանը: Սպա Վարազդատ Զաքարյանը վիրավորվել է: Նա գտնվում է Ստեփանակերտի հոսպիտալում:

Հասմիկ Հարությունյան