2 րոպեի ընթերցում
ԵՐԵՎԱՆ, 22 ՀՈՒՆՎԱՐԻ, ԱՐՄԵՆՊՐԵՍ: Հայաստանը Կորեային է արտահանձնել երեխաների պոռնկագրական լուսանկարներ տարածելու համարհետախուզման մեջ գտնվող ամերիկացի նախկին ուսուցչին:Ինչպես տեղեկացնում է «Արմենպրես»-ը, վկայակոչելով The Korea times-ն, այս մասին հունվարի 22-ին հայտնել է Կորեայի արդարադատության նախարարությունը:
Անգլերենի նախկին ուսուցիչը կասկածվում է 15-ամյա աղջկա հետ պոռնկագրական բնույթի տեսանյութ նկարահանելու և համացանցում տեղադրելու մեջ: 29-ամյա ամերիկացի կասկածյալը Կորեա էր ժամանել 2009 թվականի մայիսին: Նա սեռական հարաբերություններ էր ունեցել ավագ դպրոցի աշակերտուհու հետ, ում հետ ծանոթացել էր համացանցով, իսկ 2010 թվականի օգոստոսին դրանց տեսանյութը տեղադրել համացանցում:
Լրատվամիջոցների անդրադարձից հետո 2010 թվականի հոկտեմբերին կասկածյալը փախել է Չինաստան, ապա «Ինտերպոլի» կողմից ձերբակալվել Հայաստանում: Արտահանձնումը կազմակերպելու նպատակով Կորեայի իշխանությունները նոյեմբերին բանակցություններ են սկսել Հայաստանի կառավարության հետ: Հայաստան-Կորեա ուղիղ չվերթի բացակայության պատճառով կասկածյալին Կորեա են տեղափոխել Արաբական Միացյալ Էմիրություններով: «Ամերիկացու դեմ քրեական գործ կհարուցվի, երբ նա ժամանի Կորեա,- նշել է նախարարության պաշտոնյան: - Նրա կալանավորումից հետո մենք այդ մասին կտեղեկացնենք ԱՄՆ դեսպանությանը, որն էլ կհետևի` արդյոք նրան արդարացի են վերաբերվում»: Պաշտոնյան հրաժարվել է հաստատել` արդյոք կասկածյալն արդեն Կորեայում է, թե ոչ:Կորեայի օրենսդրության համաձայն` պոռնկագրական բնույթի մանկական լուսանկարներ տարածելու համար սահմանված է յոթ տարվա ազատազրկում և մինչև 50 մլն վոն տուգանք: