1 րոպեի ընթերցում
ԵՐԵՎԱՆ, 17 ՀՈւՆՎԱՐԻ, ԱՐՄԵՆՊՐԵՍ: Հալեպում վերջին շրջանում իրավիճակը կայուն և հանգիստ է, պայթյուններ չեն որոտացել: Այս մասին «Արմենպրես»-ին տեղեկացրեց Հալեպի աղբյուրը՝ ավելացնելով, որ բախումները ընդդիմադիր և կառավարական ուժերի միջև շարունակվում են արվարձաններում և մերձակա գյուղերում: Աղբյուրը նաև տեղեկացրեց, որ քաղաքում փոփոխություններ տեղի չեն ունեցել, իսկ էլեկտրականության խնդիրը շարունակում է մտահոգիչ մնալ: Օրվա ընթացքում միայն 1-2 ժամ էլեկտրականություն է լինում: Էլեկտրամատակարարման բացակայությանը զուգահեռ առաջանում են ջրի, հաղորդակցության հետ կապված խնդիրներ: Չնայած դրան, փոքր-ինչ կայուն իրավիճակը հալեպցիներին ուրախություն է պատճառել, և բոլորը հույսով սպասում են դրական փոփոխությունների:
Աղբյուրը նաև նշեց, որ Հալեպի հայկական դպրոցները, մյուս դպրոցների հետ միասին ավարտել են առաջին կիսամյակի քննական շրջանը և մինչև հունվարի 27-ը արձակուրդում են:
