Շմոլ գազի արտահոսքից 8 մարդ է թունավորվել

ԵՐԵՎԱՆ, 23 ԴԵԿՏԵՄԲԵՐԻ, ԱՐՄԵՆՊՐԵՍ: Քարաշամբ գյուղում և Մարտունի քաղաքում շմոլ գազի արտահոսքից թունավորվել է 8 մարդ: Ինչպես «Արմենպրես»-ին տեղեկացրին ՀՀ ոստիկանության լրատվական ծառայությունից, դեկտեմբերի 22-ին, ժամը 00.20-ին, հիվանդանոցից ոստիկանության Նաիրիի բաժնում հաղորդում է ստացվել, որ շմոլ գազի թունավորումով բուժօգնության են տեղափոխվել Քարաշամբ գյուղի բնակիչներ` 2005թ. ծնված Ասատուր, 2006թ. ծնված Միլենա և 2009թ. ծնված Կարեն Մ.-երը: Պարզվել է, որ գազի կաթսայի օդանցքի խցանման պատճառով շմոլ գազը լցվել է տուն, ինչի արդյունքում երեխաները թունավորվել են:

Նշանակվել է դատաբժշկական փորձաքննություն:

Նույն օրը, ժամը 02.00-ին, հիվանդանոցից ոստիկանության Մարտունու բաժին հաղորդում է ստացվել, որ շմոլ գազի թունավորումով իրենց մոտ են տեղափոխվել 1972թ. ծնված Մասիս, 1979թ. ծնված Հեղինե, 2002թ. ծնված Անգելինա, 2004թ. ծնված Աննա և 2009թ. ծնված Էրիկ Խ.-երը։ Մեկնած օպերատիվ խումբը պարզել է, որ նրանք թունավորվել են Էլեկտրական հոսանք արտադրող ագրեգատից առաջացած շմոլ գազից:

Կատարվում է նախաքննություն: