2 րոպեի ընթերցում
ԵՐԵՎԱՆ, 13 ՆՈՅԵՄԲԵՐԻ, ԱՐՄԵՆՊՐԵՍ: Հայաստանում որակյալ և արդյունավետ կրթություն ապահովելու համար կառավարությունը գնում է բուհերի խոշորացման ճանապարհով: Այս մասին Ազգային ժողովում կառավարության հետ հարց ու պատասխանի ժամանակ տեղեկացրեց ՀՀ վարչապետ Տիգրան Սարգսյանը՝ պատասխանելով անկախ պատգամավոր Էդմոն Մարուքյանի հարցին: «Միջազգային փորձագետների կողմից արված ուսումնասիրությունները ցույց են տվել, որ փոքր բուհերը որոկյալ կրթություն ապահովելու համար անհրաժեշտ ռեսուրսներ չունեն, ուստի մենք գնում ենք բուհերի խոշորացման ճանապարհով»,- «Արմենպրես»-ի հաղորդմամբ՝ նշեց վարչապետը:
ՀՀ վարչապետի խոսքով՝ կրթության ոլորտում այս նոր քաղաքկանությունն իրականացվում է մի նպատակով՝ բուհերը դարձնել արդյունավետ և որակյալ: «Ես վստահեցնում եմ, որ սրա հետևանքով ոչ մի ուսանող չի տուժելու, ընդհակառակը՝ նրանց համար ստեղծվում է բարձր մակարդակի կրթություն ստանալու համար անհրաժեշտ միջավայր»,- ընդգծեց նա:
Անդրադառնալով Վանաձորի ճարտարագիտական համալսարանի հարցին, որը նախատեսվում է լուծարել, ՀՀ վարչապետն ընդգծեց, որ այդ հարցի շուրջ նախարարությունը հանրային լսումներ է կազմակերպել, որին մասնակցել են բոլոր շահագրգիռ կողմերը: Նա նշեց, որ ՀՀ կրթության և գիտության նախարարին ևս մեկ անգամ կհանձնարարի հանրային լսումներ կազմակերպել և պատասխանել բոլոր հարցերին, որոնք կվերաբերեն համալսարանի ուսանողների և դասախոսների, ինչպես նաև շենքի ապագային: