ՀՀ վարչապետը Հայաստանի մրցունակության հիմք է համարում գիտելիքը

ԵՐԵՎԱՆ, 9 ՕԳՈՍՏՈՍԻ, ԱՐՄԵՆՊՐԵՍ: Մրցունակ Հայաստանի կայացման առաջին նախապայմանը գիտելիքի վրա հիմնված տնտեսության կայացումն է, որը մեր երկրի զարգացման գլխավոր հիմքն է: Ինչպես փոխանցում է «Արմենպրես»-ը, «Միասին» երիտասարդական շարժման ճամբարականների հետ Սևանա լճի ափին կայացած հանդիպման ժամանակ նման կարծիք հայտնեց ՀՀ վարչապետ Տիգրան Սարգսյանը:

Կառավարության ղեկավարի խոսքով` ժամանակակից արագ փոփոխվող աշխարհում փոխվում են նաև մարդկանց աշխարհայացքը, ընկալումները, և առաջին տեղում է հայտնվում մրցակցության բանաձևը:

«Որպեսզի համարվենք զարգացած երկիր, պետք է արագորեն հարմարվենք արագ փոփոխություններին, ինչը թելադրում է նոր գիտելիքների ստեղծում համալսարանների, գիտահետազոտական կենտրոնների կողմից»,- ասաց վարչապետը: Այս համատեքստում նա նաև նշեց, որ առաջիկա հինգ տարիների համար առաջնայնություններից մեկը հայկական առնվազն հինգ համալսարանների միջազգային հավատարմագրումն է լինելու, ինչը կապահովի բարձրորակ կրթություն:

Կառավարության ղեկավարի գնահատմամբ`հասարակության մեջամենաբացասական երևույթը տգիտությունն է` անգիտակից, անդաստիարակ երիտասարդությունը: Միևնույն ժամանակ, նրա կարծիքով` ներկայիս հայ երիտասարդության ամենադրական հատկություններից մեկը համարձակությունն է: Երիտասարդությունը բազմիցս հանդես է գալիս նոր գաղափարներով, ներկայացնում իր կարծիքը տարբեր հարցերի շուրջ: «Այդ երիտասարդությունն է լինելու մեր երկրի զարգացման շարժիչ ուժերից մեկը»,- նկատեց Տիգրան Սարգսյանը:

«Միասին» երիտասարդական շարժման ամենամյա հինգերորդ ճամբարին մասնակցում են երկու հարյուր երիտասարդներ, որոնք միջոցառմանը կազմակերպում են քննարկումներ մեր երկրում ընթացող տարբեր երևույթների վերաբերյալ: