2 րոպեի ընթերցում
ԵՐԵՎԱՆ, 6 ՕԳՈՍՏՈՍԻ, ԱՐՄԵՆՊՐԵՍ: Հայաստանի շախմատի տղամարդկանց հավաքականի օլիմպիական հաջողությունները հիմք են ծառայել հայ ծրագրավորողների համար, ոքվեր ստեղծել են նոր խաղ` «Շախմատ Լեւոն Արոնյանի հետ»:
Խաղի հիմքում Լեւոն Արոնյանի պարտիաներից վերցրված քայլերն են, որոնք խաղն ավելի են մոտեցնում գրոսմայստերի խաղաոճին: Խաղացողն ինքն է ընտրում, թե որ տարիքի «Արոնյանի» հետ է ցանկանում «մենամարտել»: Ծրագրավորողների խոսքով, այն ներկայացնում է 10-31 տարեկան Արոնյանին, խաղի բարդությունը (Level) երկաստիճան է` ըստ Արոնյանի տարիքի, այն բարձրանում է երկու աստիճանով: Խաղի ժամանակ մասնակիցը հնարավորություն ունի ընտրել եւ վեց խաղատախտակներից մեկը, եւ թե քարերի գույնը` սեւ, սպիտակ:
«Գաղափարն առաջացավ այն ժամանակ, երբ Հայաստանի տղամարդկանց հավաքականը երրորդ անգամ դարձավ շախմատային օլիմպիադայի չեմպիոն: Լեւոնը դեռ տեղյակ չէ այս մասին: Երբ խաղն ամբողջությամբ ավարտեմ, նոր միայն կներկայացնեմ նրա «դատ»-ին»,-«Արմենպրես»-ի հետ զրույցում ասաց խաղի հեղինակ, ծրագրավորող Վահե Ամիրաղյանը:
Նրա ծրագրում է շարունակել «շախմատային սեանս» խաղը ոլորտի համաշխարհային այլ ներկայացուցիչների «մասնակցությամբ»:
«Շախմատ Լեւոն Արոնյանի հետ» խաղը նախատեսված է iphone-ների եւ Ipod-ների համար: