Doing Business: «Լավագույն կին բարեգործ» մրցանակակիրը Սեւանում նորարար մանկապատանեկան կենտրոն է հիմնել
4 րոպեի ընթերցում
Փոքր եւ միջին ձեռնարկատերերի մասին«Արմենպրես»-ի ակնարկների շարքի հերոսը մասնագիտությամբ մանկավարժ, Սեւանի նորարար մանկապատանեկան կենտրոնի հիմնադիր-տնօրեն Անուշ Բադալյանն է, ով սկսնակներին խորհուրդ է տալիս չվախենալ նոր գաղափարներն իրագործելիս:
ԵՐԵՎԱՆ, 11 ՀՈՒԼԻՍԻ, ԱՐՄԵՆՊՐԵՍ: 40-ամյա Անուշ Բադալյանը Սևանի իր հայրական տան նախկին վայրում հիմնել է մի կենտրոն, որը նորույթ է կուրորտային քաղաքի համար: Ֆինանսավորումը մանկավարժի կրթություն ունեցող Անուշ Բադալյանին տրամադրել է ռուսաստանաբնակ իր եղբայր Հուսիկ Բադալյանը: «Երբ սկսում էինք շենքը կառուցել, կոնկրետ չէինք մտածել, թե ինչ պետք է հիմնվի այնտեղ: Բայց ժամանակի ընթացքում հասկացանք, որ Սևանում չկա մի տեղ, մի կենտրոն, որտեղ կարող են գալ մանուկները և այնտեղ ժամանակ անցկացնել»,- հիշում է Բադալյանը:
1992-2006թթ. Սևանի Խաչատուր Աբովյանի անվան դպրոցում որպես տարրական դասարանների դասվար աշխատած Բադալյանն ասում է` մտածել են, թե ինչու պետք է Երևանի երեխաներն իմանան, թե ինչ է «Լաբիրինթոս» խաղը և խաղան դրանով, իսկ սևանցի մանուկներն ու պատանիները չունենա այդ հնարավորությունը: Կենտրոնի բացումը տեղի է ունեցել 2012թ. սեպտեմբերին: «Սևան» կենտրոնում գործում են նախակրթարանը, մանկական սրճարանը, մանկապատանեկան խաղասրահը: Սրճարանում ոգելից խմիչքն ու ծխախոտն արգելված են: Մանկապատանեկան կենտրոնի մուտքը միայն մինչև 14 տարեկան երեխաների և պատանիների համար է, իսկ մեծահասակների համար կենտրոնի շենքում կահավորվել են մարզասրահը, գեղեցկության սրահը:
Նախակրթարանի 4-6 տարեկան սաներին Բադալյանը դաստիարակում և ուսուցանում է «Մխիթար Սեբաստացի» կրթահամալիրի մեթոդներով: Կրթօջախ է այցելում 20-25 երեխա: Կրթահամալիրը հավանության է արժանացրել նախակրթարանի շենքային պայմանները, իսկ ուսուցիչները վերապատրաստումից հետո արդեն այս սեպտեմբերին սկսեն դավանդել «Մխիթար Սեբաստացու» ծրագրով: Ուսուցումը վճարովի, սակայն մատչելի է: Սևանցիները, ասում է Բադալյանը, սկսել են ընկալել վճարովի որակյալ կրթության առավելությունները: Կենտրոնում երեխաներն ապահովված են սննդով, գրենական պիտույքներով, իսկ Գեղարքունիքի ցուրտ ձմռան ամիսներին կենտրոնում միջին ջերմաստիճանը 23-25 աստիճան է:
Մանկավարժի մասնագիտությանն Անուշ Բադալյանն ավելացրել է նաև գործարարի գիտելիքն ու հմտությունները: Ասում է, որ ինքնուս գործարար է, օգնել են բիզնես ունեցող մտերիմներն ու բարեկամները: Թեկուզ հատուկ դասընթացներ չի անցել, սակայն իր համար պարզ է դարձել, որ փոքր բիզնեսի կայացման համար պետությունը պետք է արտոնություններ տրամադրի սկսնակներին: «Օրինակ` կարելի է որոշակի արտոնյալ ժամանակաշրջան սահմանել առանց հարկերի: Մարդիկ կան մեծ ներդրումներ են արել, սակայն չեն կարողացել կայանալ»,- փաստում է սկսնակ գործարարը: 11 աշխատող ունեցող կենտրոնի սեփականատեր-տնօրեն Անուշ Բադալյանը նշում է, որ մեր երկրում բիզնես սկսելը հեշտ է, զարգացնելն ու կայունացնելն է դժվար: Խոսքը հատկապես մարզերի մասին է. «Հարկերն ու տուրքերն են շատ ու բարդ»,- ասում է:
Սկսնակներին էլ խորհուրդ է տալիս չվախենալ նոր գաղափարներն իրագործելիս: Չնայած, ասում է, մեր երկրում վստահությունը քիչ է ապագայի նկատմամբ, այդուամենայնիվ, պետք չէ վարանել:
2013թ. ապրիլի 5-ին Անուշ Բադալյանը ստացել է «Լավագույն կին բարեգործ» մրցանակը` ՀՀ վարչապետի «Լավագույն կին գործարար 2013» մրցանակաբաշխության շրջանակում: 2012թ. նա եղբոր հովանավորությամբ կազմակերպել է անապահով ընտանիքների և մանկատան մոտ 1000 երեխաների մկրտությունը: Նա այդ երեխաներին նաև պարբերաբար հյուրընկալում է իր կենտրոնում:
Հաջողության պատմությունը եւ լուսանկարները տրամադրել է Փոքր եւ միջին ձեռնարկատիրության զարգացման ազգային կենտրոնը
Հեղինակ՝ Դավիթ Մուրադյան