Աշխարհահռչակ ռեժիսոր Արտավազդ Փելեշյանը «Ոսկե ծիրան»-ի շրջանակներում կարժանանա «Եղիցի լույս» մրցանակին

ԵՐԵՎԱՆ, 5 ՀՈՒԼԻՍԻ, ԱՐՄԵՆՊՐԵՍ: «Ոսկե ծիրան» միջազգային 10-րդ կինոփառատոնին ավելացել է նաև ռուսական ֆիլմերի ծրագիրը` Ռուսաստանի Դաշնության մշակույթի նախարարության առաջարկութամբ: Այս մասին լրագրողների հետ հանդիպման ժամանակ տեղեկացրեց «Ոսկե ծիրան» կինոփառատոնի ծրագրերի տնօրեն Միքայել Ստամբոլցյանը: «Կինոփառատոնի շրջանակներում արդեն ավանդական դարձած «ԱՊՀ երկրների կինոն» ծրագրին ավելացել է նաև ռուսական ծրագիրը»,- «Արմենպրես»-ի հաղորդմամբ` ասաց Միքայել Ստամբոլցյանը:

«ԱՊՀ երկրների կինոն» ծրագրի համակարգող Անահիտ Ղազարյանը տեղեկացրեց, որ այս տարի այդ ծրագիրը կունենա մի փոքր այլ ուղղվածություն: Այն կանցկացվի Գյումրիում և կկրի «ԱՊՀ երկրների կինոն Գյումրիում` ԱՊՀ երկրների մշակութային մայրաքաղաքում» խորագիրը: «Ծրագիրը կներառի 15 ֆիլմ տարբեր երկրներից, այդ թվում, երկու ֆիլմ հայ ռեժիսորներից, որոնցից մեկը Հարություն Խաչատրյանի «Անվերջ փախուստ, հավերժ վերադարձ» ֆիլմն է»,-ասաց Անահիտ Ղազարյանը: «ԱՊՀ երկրների կինոն» ծրագրի բացումը տեղի կունենա հուլիսի 9-ին` ժամը 18.00-ին Գյումրու Հոկտեմբեր կինոթատրոնում: Կուցադրվի նաև «Միմինո» ֆիլմը. այս տարի լրանում է ֆիլմի մեծ էկրան բարձրանալու 35 տարին: Անդրադառնալով ռուսական ծրագրին` Անահիտ Ղազարյանը նշեց, որ ընդգրկված են ռուսական վերջին արտադրության վեց ֆիլմեր, որոնցից երեքը ներկայացված են եղել Սոչիի «Կինոտավր» փառատոնին և ստացել մի շարք մրցանակներ:

Ասուլիսին ներկա «Ոսկե ծիրան» միջազգային կինոփառատոնի գլխավոր տնօրեն Հարություն Խաչատրյանը հայտնեց, որ անցյալ տարվանից Հայ Առաքելական եկեղեցու «Եղիցի լույս» մրցանակն է շնորհվում «Ոսկե ծիրանի» շրջանակներում, որով էլ փորձ է արվում մեծացնել Հայ եկեղեցու դերը միջազգային կինոփառատոնի ժամանակ: «Հայտարարեմ ձեզ, որ այս տարի և Վեհափառ Հայրապետի, և մեր կողմից հաստատվել է Արտավազդ Փելեշյանի թեկնածությունը` ստանալու «Եղիցի լույս» մրցանակը: Հայ կինեմատոգրաֆիայի մեջ, կարծում եմ, նա է արժանի առաջինը ստանալու այդ մրցանակը»,-ասաց «Ոոկե ծիրան» կինոփառատոնի գլխավոր տնօրենը:

Գևորգյան հոգևոր ճեմարանի տեսուչ և Մայր Աթոռ հոգևոր-կրթական հաստատությունների գերատեսուչ Գևորգ Սրբազանը տեղեկացրեց, որ Արտավազդ Փելեշյանի մրցանակը կհանձնվի Մայր Աթոռ Սուրբ Էջմիածնում հուլիսի 12-ին` ժամը 14.00-ին, որից հետո հյուրերի համար կանցկացվի էքսկուրսիա Մայր Աթոռի թանգարաններում:

Հարություն Խաչատրյանը հարտարարեց մրցույթ` հայկական կինոյի մասին լավագույն հոդված և տեսանյութ պատրաստողների համար:

«Ոսկե ծիրան» երևանյան միջազգային 10-րդ կինոփառատոնը կկայանա հուլիսի 7-14-ը:Ամեն տարի իրականացվող «Ոսկե ծիրան» միջազգային կինոփառատոնը հիմնվել է Հայաստանի Հանրապետության մայրաքաղաք Երևանում 2004թ-ին «Ոսկե ծիրան» կինոյի զարգացման հիմնադրամի, Կինոգետների և կինոլրագրողների հայկական ասոցիացիայի կողմից` ՀՀ արտաքին գործերի նախարարության, ՀՀ մշակույթի նախարարության և Մշակույթի զարգացման բարեգործական հիմնադրամի աջակցությամբ: