4 րոպեի ընթերցում
Փոքր եւ միջին ձեռնարկատերերի մասին«Արմենպրես»-ի ակնարկների շարքի հերոսը հյուրատնային և օթևանային բիզնեսով զբաղվող Քրիստինա Անտոնյանն է, ով սկսնակներին հորդորում է իրենց բիզնեսի համար ճիշտ մոտեցում որդեգրել:
ԵՐԵՎԱՆ, 4 ՀՈՒԼԻՍԻ, ԱՐՄԵՆՊՐԵՍ: Հյուրատնային և օթևանային բիզնեսը շատ կարևոր դեր է խաղում երկրի զբոսաշրջության զարգացման հարցում: Բազմաթիվ տեսարժան վայրերում բացակայում են օթևանները և հյուրատները, ինչը զբոսաշրջիկներին ստիպում է հրաժարվել հեռավոր մարզեր ուղևորություններից: Հյուրատների փոքրիկ, հարմարավետ և շատ անմիջական միջավայրում օտարերկրացիները կարողանում են ծանոթանալ նաև ազգային մշակույթին: Հայաստանում արդեն սկսել է զարգանալ գիշերակաց և նախաճաշ (Bed and Breakfast) տրամադրող հյուրատների ոլորտը:
37-ամյա Քրիստինա Անտոնյանը, մինչև Արմավիր քաղաքում հյուրատուն և ռեստորան բացելը, ունեցել է գեղեցկության սրահ: «Միտք առաջացավ նաև ռեստորան ու հյուրատուն ունենալ: 2000թ.-ից գեղեցկության սրահն արդեն կար: Այն արդեն մենք վերածել ենք սպա-սրահի»,- հիշում է կին գործարարը: Նա մեկտեղել է գեղեցկության սրահի, հյուրատան, սրճարանի և ռեստորանի ծառայությունները մեկ հարկի տակ: Քրսիտինան ասում է, որ բուն հյուրատան գաղափարի պատճառն իր` խոհանոց շատ սիրելն է:
Հյուրատունը գործում է 2008թ.-ից: Սկզբում ինքն է պատրաստել ճաշատեսակները, այնուհետև, գործի զարգանալուն զուգահեռ, հրավիրել է խոհարարների: Նրա կարծիքով, Հայաստանում դժվար է բիզնեսը զարգացնել, մանավանդ, եթե այն գործում է մարզերում: «Ժողովրդի ֆինանսական վիճակն է շատ բարդ, կոնկրետ մեր մարզում և քաղաքում դա այդպես է»,- փաստում է Անտոնյանը:
Որպես արդեն փորձառու գործարար, Քրիստինա Անտոնյանը սկսնակներին հորդորում է ճիշտ մոտեցում որդեգրել իրենց մտածած բիզնեսի նկատմամբ: Ճիշտ մոտեցում ասելով` Անտոնյանը նկատի ունի գործի նախնական ուսումնասիրությունը, ներքին խոհանոցը տնտղելը և շուկայի վիճակին ծանոթանալը: Նաև կարևոր է պլանավորումը և այդ պլանին հետևելը: «Եթե այդ ամենը ճիշտ արվի, տապալումը հնարավոր չէ»,- վստահեցնում է արմավիրցի կին գործարարը: Նա հույժ կարևոր է համարում նաև գործարար գիտելիքը, որի միջոցով բիզնեսը զարգանում է ճիշտ ուղղությամբ: Սակայն, ըստ նրա, ամենակարևորը ռիսկն է, որին պետք է դիմի սկսնակը:
Անտոնյանի հյուրատունը կարելի է համարել ընտանեկան բիզնես: Օգնում են մայրը, քույրը, ամուսինը, հաճախ գործին միանում է նաև դուստրը: Ապագայի համար Քրիստինա Անտոնյանը ցանկանում է ընդլայնել հյուրատունը և մատուցվող ծառայությունների շրջանակը:
Հայաստանի ՓՄՁ ԶԱԿ-ը զբոսաշրջության մեջ հյուրատնային ոլորտի դերը բարձրացնելու և այն ավելի կայուն դարձնելու համար մարզերում սկսել է հյուրատնային բիզնեսի զարգացման ծրագիր: Լոռիում, Տավուշում և Վայոց Ձորում մեկնարկած նախաձեռնությունը միտված է բարելավել և կատարելագործել ծառայությունների մատուցման որակը և օգնել հյուրատների սեփականատերերին բազմապատկել եկամուտը: Լոռու մարզում արդեն 20 հյուրատուն մասնակցում է ծրագրին: Տավուշում մասնակիցների թիվը 6-ն է, իսկ Վայոց Ձորում` 4-ը: Նրանք ստանում են տեխնիկական աջակցություն, որը ներառում է հյուրատների կառուցման, կառավարման, սպասարկման չափորոշիչների տրամադրումը: Ստանում են նաև գործարար գիտելիք: Իսկ դասընթացների վերջում հյուրատների սեփականատերերը նաև հնարավորություն են ունենում ֆինանսական աջակցություն ստանալ ՓՄՁ ԶԱԿ-ի գործընկեր բանկերից: Կենտրոնի մասնագետներն այժմ ակտիվ աշխատում են մյուս մարզերում, որպեսզի բացահայտեն տեղական հյուրատների կարիքները և հավաքագրեն ցանկացողներին:
Հաջողության պատմությունը եւ լուսանկարները տրամադրել է Փոքր եւ միջին ձեռնարկատիրության զարգացման ազգային կենտրոնը
Հեղինակ՝ Դավիթ Մուրադյան