Հայկական Կարմիր խաչը 100 միլիոն դրամի օգնություն կցուցաբերի կարկուտից տուժած համայնքներին
2 րոպեի ընթերցում
ԵՐԵՎԱՆ, 14 ՀՈՒՆԻՍԻ, ԱՐՄԵՆՊՐԵՍ: Հայկական Կարմիր խաչի ընկերությունը 100 միլիոն դրամի օգնություն կցուցաբերի կարկուտից տուժած համայքների բնակիչներին: Ինչպես «Արմենպրես»-ին տեղեկացրին ընկերության մամուլի ծառայությունից, հետևելով իր մարդասիրական առաքելությանը և ելնելով Կարմիր խաչի ու Կարմիր մահիկի հիմնարար սկզբունքներից` ընկերությունն ակտիվ գործունեություն է սկսել աղետից տուժած համայնքներին մարդասիրական օգնություն տրամադրելու համար: Այդ նպատակով ՀԿԽԸ-ն դիմել է Կարմիր խաչի և Կարմիր մահիկի ընկերությունների միջազգային ֆեդերացիայի Արտակարգ իրավիճակներին արձագանքման հիմնադրամին: Ընկերության դիմումն ստացել է դրական արձագանք եւ Արմավիրի մարզի 14 համայնքների 4000 բնակչի սննդի և հիգիենիկ պարագաների փաթեթներ տրամադրելու համար մոտ 100 միլիոն ՀՀ դրամ կամ` 224 400 շվեյցարական ֆրանկ է տրամադրվել:
Բնակիչներն տրամադրվելիք յուրաքանչյուր փաթեթի պարունակությունը հաշվարկված է բավարարելու տուժած ընտանիքների 3 ամսվա սննդի և հիգիենիկ պարագաների կարիքները: ՀԿԽԸ-ի կողմից, հաշվի առնելով միջազգային չափորոշիչները, մշակվել են բաշխման սկզբունքները, յուրաքանչյուր փաթեթի պարունակությունը և շահառուների ընտրության սկզբունքները՝ առավել խոցելիներին աջակցելու համար: Մարդասիրական օգնության բաշխումը նախատեսվում է իրականացնել 2013 թվականի հուլիսի առաջին շաբաթվանից:
Մայիսի 12-17-ը տեղի ունեցած աղետալի կարկուտը մեծ վնաս հասցրեց Արմավիրի մարզի 46 համայնքների: ՀՀ Գյուղատնտեսության նախարարության և Արմավիրի մարզի արտակարգ իրավիճակների հետևանքների գնահատման հանձնաժողովի հաշվետվությունների համաձայն` ամբողջովին կամ մասնակի վնասվել են 46 համայնքների գյուղատնտեսական դաշտերը և այգիները, տուժել է 12 800 ընտանիք, իսկ վնասի մոտավոր չափը կազմել է 25.268.56 մլրդ. ՀՀ դրամ կամ 60 մլն. ԱՄՆ դոլլար: