Doing Business: Հաջողակ կին գործարարի համար բիզնեսում չկան անհաղթահարելի խոչընդոտներ
6 րոպեի ընթերցում
Փոքր եւ միջին ձեռնարկատերերի մասին«Արմենպրես»-ի ակնարկների շարքի հերոսը ՀՀ վարչապետի «Լավագույն կին գործարար» մրցանակաբաշխության «Լավագույն կին նորարար, նախաձեռնող» մրցանակին արժանացած թրենինգային և խորհրդատվական ընկերության հիմնադիր Արևիկ Սարգսյանն է, ով սկսնակներին և ապագա գործարարներին խորհուրդ է տալիս գործը սկսելուց առաջ անպայման գործարար գիտելիքներ ձեռք բերել:
ԵՐԵՎԱՆ, 13 ՀՈՒՆԻՍԻ, ԱՐՄԵՆՊՐԵՍ: Արևիկ, Լիլիթ և Աննա անունով ընկերուհիները 1994 թվականին միավորվել և ստեղծել են այսօր Հայաստանում հայտնի «ԱՐԼԻԱՆ» թրենինգային և խորհրդատվական ընկերությունը: Գաղափարը եղել է Արևիկ Սարգսյանինը: Նրա եղբայր Արսենն ընկերության հիմնադրումից երկու տարի առաջ Մոսկվայից ուղարկել էր հանրային կապերի մասին Սեմ Բլեքի հեղինակած գրքերից մեկը: «Գիրքը շատ հետաքրքրեց ինձ: Այն ժամանակ բոլորիս համար մարկետինգ, PR և նման հասկացությունները դեռ նոր էին: Երբ ես իմ շրջապատում առաջարկում էի ստեղծել բիզնես խորհրդատվական կազմակերպություն, բոլորը ծիծաղում էին, թե` երկրում բիզնես չկա, ի՞նչ բիզնես խորհրդատվական կազմակերպության մասին է խոսքը»,- հիշում է 47-ամյա Արևիկ Սարգսյանը:
Առաջին պատվերը, որն էլ դարձել է ընկերությունը գրանցելու և կնիքը ձեռք բերելու առիթը, եղել է Արմենիա (ներկայում` Մարիոթ) հյուրանոցի համար հանրային կապերի խորհրդատվական ծրագիրը: Դրանից հետո ավելացել են թե ծառայությունների շրջանակը և թե պատվիրատուների քանակը: Հանրային կապերին գումարվել են սոցիոլոգիական հետազոտությունը, բիզնես խորհրդատվությունը, դասընթացները և այլ ծառայություններ:
Ընկերության հպարտությունն է նաև պետական գերատեսչությունների հետ սերտ գործակցությունը: Արդեն մի քանի տարի «ԱՐԼԻԱՆԸ» Զբաղվածության պետական ծառայություն գործակալության հետ գործընկերության շրջանակում Հայաստանի գործազուրկների համար իրականացնում է վերապատրաստման դասընթացներ Երևանում և մարզերում:
2013թ. ապրիլի 5-ին հենց դասընթացների ոլորտի նորարարությունների համար Արևիկ Սարգսյանին շնորհվել է ՀՀ վարչապետի «Լավագույն կին գործարար» մրցանակը` «Լավագույն կին նորարար, նախաձեռնող» անվանակարգում: Որպես կին գործարար` Արևիկ Սարգսյանը չի առանձնացնում բարդությունները կանանց և տղամարդկանց համար. «Դրանք ընդհանուր են բոլորի համար: Բիզնեսում չկան անհաղթահարելի խոչընդոտներ»,- վստահ է Սարգսյանը: Սակայն, ըստ նրա, կա մի երևույթ, որը ոչ թե բարդություն կամ խոչընդոտ է, այլ պարզապես տհաճ հայ իրականության համար: «Հաճախ մեր ընկերությունները նախընտրում են արտասահմանյան բրենդային ընկերություններին վճարել շատ բարձր գին` անտեսելով մեր տեղական ընկերությունների ծառայությունները: Սակայն իրականում այդ բրենդային ընկերությունների մատուցած ծառայությունների որակը ոչ թե առավել չէ, այլ նույնիսկ որոշ առումներով զիջում է մեր մատուցած ծառայություններին»,- արձանագրում է փորձառու գործարարը:
Սկսնակներին և ապագա գործարարներին Արևիկ Սարգսյանը խորհուրդ է տալիս գործը սկսելուց առաջ անպայման ստանալ գործարար գիտելիք: Ըստ նրա, որքան էլ որևէ մեկն ունենա մասնագիտական գիտելիք, բիզնես սկսելուց առաջ պետք է ստանալ նաև բիզնեսը վարելու գիտելիքը և հմտությունները: «Բիզնես դասընթացների ժամանակ տեղի է ունենում կարևորագույն մի բան, որը այլ պարագայում տեղի չի ունենում: Կոտրվում է վախը: Մարդ ձեռք է բերում հատկություններ, ինչը սովորաբար այլ վայրերում, տեղի չի ունենում: Ասում են` գործարարներն այլ մարդկանցից տարբերվում են ժպիտով, բայց դա դեմքի ժպիտը չէ, այլ ներքին հոգեվիճակը»,- շեշտում է դասընթացների մասնագետ Արևիկ Սարգսյանը:
Արևիկ Սարգսյանը դասավանդում է Հայաստանի պետական ճարտարագիտական համալսարանում: Նա ռադիոյի և կապի ֆակուլտետում ուսանողներին սովորեցնում է ալեհավաքներ պատրաստելու և նախագծելու տեխնիկան: Նրա նախաձեռնությամբ երիտասարդ գիտնականների, ասպիրանտների ու ուսանողների համար Ճարտարագիտական համալսարանում ստեղծվել է նորարարության և ձեռներեցության դպրոց: Նա նաև Հայաստանի մեծահասակների կրթության ասոցիացիայի նախագահն է:
Արևիկ Սարգսյանն ունի որդի, ապրում է մոր` Մերի Սարգսյան-Հերունու հետ: Տիկին Մերին աշխարհահռչակ գիտնական Պարիս Հերունու քույրն է: Լեզվաբան է, պատրաստել և իրականացրել է «ԱՐԼԻԱՆԻ» դասընթացներից մեկը` «Վաճառքի լեզուն» խորագրով: Արևիկ Սարգսյանի խոսքով` ժամանակի ընթացքում իր հիմնադրած ձեռնարկությունը դարձել է ընտանեկան բիզնես. այնտեղ է աշխատում նաև եղբայրը` Արսեն Սարգսյանը: Նա ասում է, որ Սեմ Բլեքի գիրքը քրոջն ուղարկելով` չի ենթադրել, որ այն կարող է դառնալ նոր գործի հիմնադրման առիթ: «Երբ ես իմացա, որ Արևիկն ընկերություն է հիմնադրել, Եվրոպայում էի աշխատում, աշխատանքս ավարտեցի և վերադարձա Հայաստան ու միացա Արևիկին»,- հիշում է Արսեն Սարգսյանը: Գործի ապագայի հանդեպ լավատեսական է տրամադրված: Խորհրդատվական դաշտը խոշոր ներդրում չի պահանջում, ասում է, դու վաճառում ես քո գիտելիքը` առանց ֆինանսական լուրջ ներդրում անելու:
Հաջողության պատմությունը եւ լուսանկարները տրամադրել է Փոքր եւ միջին ձեռնարկատիրության զարգացման ազգային կենտրոնը
Հեղինակ՝ Դավիթ Մուրադյան