Արթուր Բաղդասարյանը Լիսաբոնում կմասնակցի թմրամիջոցների ապօրինի շրջանառության դեմ պայքարին նվիրված համաժողովին

ԵՐԵՎԱՆ, 21 ՄԱՅԻՍԻ, ԱՐՄԵՆՊՐԵՍ: Ազգային անվտանգության խորհրդի քարտուղար, Հայաստանում թմրամոլության և թմրամիջոցների ապօրինի շրջանառության դեմ պայքարի հարցերը համակարգող միջգերատեսչական հանձնաժողովի նախագահ Արթուր Բաղդասարյանը Թմրամիջոցների և թմրամոլության եվրոպական մոնիտորինգի կենտրոնի ղեկավար Վոլֆգանգ Գոցի հրավերով մայիսի 21-23-ը կայցելի Լիսաբոն: Ինչպես «Արմենպրես»-ին տեղեկացրին ԱԱԽ մամուլի ծառայությունից, Արթուր Բաղդասարյանը կմասնակցի թմրամոլության և թմրամիջոցների ապօրինի շրջանառության դեմ պայքարի հարցերին նվիրված «REITOX շաբաթ» միջազգային համաժողովին, ուր ներկայացված են 42 պետությունների ներկայացուցիչներ:

Վոլֆգանգ Գոցի հետ հանդիպման ժամանակ կքննարկվեն «REITOX» թմրամոլության և թմրամիջոցների եվրոպական ցանցում Հայաստանի ընդգրկման, Հայաստանում թմրամոլների վերականգնողական կենտրոնի ստեղծմանը, ինչպես նաև Հայաստանի Ազգային անվտանգության խորհրդի և թմրամիջոցների ու թմրամոլության եվրոպական մոնիտորինգի կենտրոնի միջև համագործակցության հուշագրի ստորագրմանը վերաբերող հարցեր: Նախատեսվում են նաև Արթուր Բաղդասարյանի պաշտոնական այլ հանդիպումներ երկկողմ և միջազգային ձևաչափով: