2 րոպեի ընթերցում
ԵՐԵՎԱՆ, 22 ՓԵՏՐՎԱՐԻ, ԱՐՄԵՆՊՐԵՍ: Հայաստանի Հանրապետության նախագահի թեկնածու, «Ժառանգություն» կուսակցության առաջնորդ Րաֆֆի Հովհաննիսյանը պատրաստվում է հանրահավաքներ անցկացնել Հայաստանի որոշ քաղաքներում:
«Արմենպրես»-ի հաղորդմամբ` փետրվարի 22-ին Ազատության հրապարակում այդ մասին նշեց Րաֆֆի Հովհաննիսյանը: Նրա հանրահավաքային երթուղին կընդգրկի Աշտարակը, Վանաձորը, Գյումրին եւ կեզրափակվի Երեւանում: «Մենք առիթ կունենանք նորից լինել այս հրապարակում, մեր ողջ ներուժն ուղղել դեպի այն ապագան, որը մերն է եւ որին մենք արժանի ենք»,- նշեց նա: Կուսակցության առաջնորդը շարունակում է վիճարկել փետրվարի 18-ին կայացած նախագահական ընտրությունների արդյունքները: Հանրահավաքները շարունակելու որոշումը Հավհաննիսյանն ընդունել է Հանրապետության գործող եւ վերընտրված նախագահ Սերժ Սարգսյանի հետ փետրվարի 21-ին կայացած հանդիպումից հետո: Փետրվարի 22-ին հրավիրված հանրահավաքը Հովհաննիսյանն ավարտեց մայրաքաղաքի փողոցներով երթով: Հանրահավաքին են մասնակցել նաև ընդդիմադիր գործիչներ`ՀՀ նախագահի նախկին թեկնածու Անդրիաս Ղուկասյանը, ՀՅԴ ԳՄ ներկայացուցիչ Արմեն Ռուստամյանը, ԱԺ պատգամավոր Նիկոլ Փաշինյանը: Նախագահական ընտրությունները Հայաստանում անցկացվել են փետրվարի 18-ին: Հրապարակվել են ընտրությունների նախնական արդյունքները, վերջնական արդյունքները կամփոփվեն փետրվարի 25-ին: Նախնական արդյունքների համաձայն` երկրի ղեկավարի պաշտոնում վերընտրվեց Սերժ Սարգսյանը: Նա ստացավ 861 հազար 160 քվե՝ վավեր ձայների 58,64 տոկոսը: