368.12
ԱՄՆ Հայ դատի հանձնախումբը Օբամային կոչ է արել մինչեւ ապրիլի 24-ը ճանաչել Հայոց ցեղասպանությունը
2 րոպեի ընթերցում
ԵՐԵՎԱՆ, 19 ՀՈՒՆՎԱՐԻ, ԱՐՄԵՆՊՐԵՍ: ԱՄՆ հայ դատի հանձնախումբը շնորհավորել է ԱՄՆ նախագահ Բարաք Օբամային երկրորդ անգամ նախագահ ընտրվելու եւ երդմնակալության արարողության կապակցությամբ` կոչ անելով նրան վերանայել ` Հայոց ցեղասպանության հետ կապված իր դիրքորոշումը:«Արմենպրես»-ի փոխանցմամբ` ԱՄՆ նախագահին հղված նամակում մասնավորապես ասվում է. «Մենք շնորհավորում ենք Ձեզ` երկրորդ անգամ նախագահ ընտրվելու կապակցությամբ, եւ ԱՄՆ-ում ապրող երկու միլիոն հայերի անունից ցանկանում ենք տեղեկացնել Ձեր վարչակազմի հետ աշխատելու, ԱՄՆ քաղաքականության սկզբունքներին ու առաջնահերթություններին օժանդակելու` մեր շահագրգռության մասին»:
ԱՄՆ հայ դատի հանձնախմբի նախագահ Քեն Խաչիկյանն ընդգծել է հանձնախմբի ղեկավարության Օբամայի հետ հանդիպման անհրաժեշտությունը, որի ժամանակ նրանց հնարավորություն կտրվի իմանալ նախագահի քաղաքական սկզբունքների եւ առաջնահերությունների, ինչպես նաեւ միմյանց հետ հետագա համագործակցության հեռանկարների մասին:
Ավելի վաղ, Ամերիկայի Հայ դատի հանձնախումբը էլեկտրոնային փոստի միջոցով քարոզարշավ է սկսել, որով Օբամայից պահանջում են ճանաչել Հայոց ցեղասպանությունը` հիշեցնելով նրան Սենատում եղած տարիներին Հայոց ցեղասպանության պատմական ճշմարտությունն անընդհատ պնդելու հանգամանքը: Փոստային առցանց նամակում ասվում է. «Հայաստանը եւ ամբողջ աշխարհն այսօր ապահովագրված չեն վտանգներից, ինչը Հայոց ցեղասպանությունն իրականացնող երկրի անպատժելիության արդյունքն է»: Նամակում կոչ է արվում ԱՄՆ նախագահին մինչեւ ապրիլի 24-ը հարգել խոստումն ու ճանաչել Հայոց ցեղասպանությունը եւ ԱՄՆ-ն տանել մարդասիրության ու մարդու իրավունքների պաշտպանության ճիշտ ճանապարհով:
Բաժանորդագրվեք մեր ալիքին Telegram-ում