Կոմպոզիտոր Տիգրան Մանսուրյանի հիշողության մեջ Էդուարդ Միրզոյանը կմնա որպես լուսավոր անձնավորություն
2 րոպեի ընթերցում
ԵՐԵՎԱՆ, 8 ՀՈԿՏԵՄԲԵՐԻ, ԱՐՄԵՆՊՐԵՍ: Հայաստանի և ԽՍՀՄ ժողովրդական արտիստ, մեծանուն կոմպոզիտոր Էդուարդ Միրզոյանի վերջին հրաժեշտը տեղի ունեցավ Արամ Խաչատրյանի անվան ֆիլհարմոնիկ համերգասրահում:
Կոմպոզիտորի վերջին հրաժեշտին իրենց մասնակցությունն էին բերել ՀՀ Նախագահ Սերժ Սարգսյանը, Առաջին տիկին Ռիտա Սարգսյանը, Ն.Ս.Օ.Տ.Տ.Ծայրագույն Պատրիարք և Ամենայն Հայոց Կաթողիկոս Գարեգին Բ-ն, ՀՀ վարչապետ Տիգրան Սարգսյանը, ՀՀ ԱԺ նախագահ Հովիկ Աբրահամյանը, այլ բարձրաստիճան այրեր, մշակույթի գործիչներ:
ՀՀ Մշակույթի նախարար Հասմիկ Պողոսյանի հավաստմամբ` Էդուարդ Միրզոյանը մեր երաժշտարվեստի ամենակարկառուն դեմքերից մեկն էր:«Ամենամեծ ժառանգությունը, որ Էդուարդ Միրզոյանը մեզ թողեց` իր երաժշտություն է: Թող այսպիսի տաղանդավոր մարդիկ անսպառ լինեն»,-«Արմենպրես»-ի հաղորդմամբ ասաց նախարարը:
Կոմպոզիտոր Տիգրան Մանսուրյանի հիշողության մեջ Էդուարդ Միրզոյանը կմնա որպես լուսավոր անձնավորություն:«Բազմադարյա հայ երաժշտության վերջին նահապետն էր Էդուարդ Միրզոյանը: Նրա երաժշտության մեջ մշտապես առկա էր լավատեսությունը, իմաստուն ներքին ժպիտը»,-ասաց կոմպոզիտորը:
Էդուարդ Միրզոյանը կհուղարկավորվի Կոմիտասի անվան զբոսայգու պանթեոնում։
Հայ մեծ կոմպոզիտոր Էդուարդ Միրզոյանը մահացել էր հոկտեմբերի 5-ին երկարատեւ հիվանդությունից հետո:
Կոմպոզիտորի հուղարկավորման արարողությունը կազմակերպելու կապակցությամբ ստեղծվել է կառավարական հանձնաժողով: