Սաֆարովը բացահայտեց թե' Ադրբեջանի, թե' Թուրքիայի ռազմական գաղտնիքը. Հայկ Դեմոյան

ԵՐԵՎԱՆ,11 ՍԵՊՏԵՄԲԵՐԻ, ԱՐՄԵՆՊՐԵՍ: Ռամիլ Սաֆարովը ցմահ ազատազրկումից հետո խայտառակեց իր երկիրը: Նա բացահայտեց թե' Թուրքիայի, թե' Ադրբեջանի ռազմական գաղտնիքը` ասելով, որ ռազմական պատրաստություն է անցել Հյուսիսային Կիպրոսի թուրքական ռազմաբազաներում: Այս մասին հայտարարեց Հայոց ցեղասպանության թանգարան-ինստիտուտի տնօրեն Հայկ Դեմոյանը սեպտեմբերի 11-ին հրավիրված մամուլի ասուլիսի ժամանակ: «Սա բացառիկ բացահայտում է. ստացվում է, որ Թուրքիան իր կողմից օկուպացված եվրոպական տարածքում մարդասպան է պատրաստում: Ադրբեջանը կրկնակի հանցագործ է, քանզի նա դուրս է եկել նաև իր երկրի ռազմական օրենքների դեմ` ազատելով և հերոսացնելով մարդասպանին»,- «Արմենպրես»-ի հաղորդմամբ` ասաց Դեմոյանը:

Նրա գնահատմամբ` Հունգարիայի դատարանի կողմից Սաֆարովի գործը գնահատվեց ըստ արժանվույն` ցմահ` չնայած այն հանգամանքին, որ և' ադրբեջանական, և' թուրքական կողմը լուրջ գործունեություն էր ծավալում այդ վճռին խոչընդոտելու համար: Իսկ ոճրագործին արտահանձնելու որոշման արդյունքում Հայաստանի կողմից Հունգարիայի հետ դիվանագիտական հարաբերությունների դադարեցումը, ըստ Դեմոյանի, ճիշտ և ադեկվատ որոշում էր:

«Այս գործընթացն ուղղված էր և' հայերի, և' հունգարների դեմ, քանզի վերջիններս ևս խիստ վրդովված են Սաֆարովի արտահանձնման պատճառով: Այս գործընթացն արդեն նպաստել է Հայաստանի դիրքորոշման կոշտացմանը: Հայաստանն ունի ոսկե քայլ անելու հնարավորություն. դա պատժիչ քայլն է: Դեպքերի նման զարգացումը կարող է լրջորեն նպաստել ԼՂՀ-ի միջազգային ճանաչման գործընթացին»,- հայտեց Դեմոյանը:

2004-2006 թթ.-ին Հայկ Դեմոյանը հանդիսացել է ՀՀ պաշտպանության նախարարության պաշտոնական ներկայացուցիչը Բուդապեշտում Գուրգեն Մարգարյանի գործով դատական լսումներին:

2004 թվականի փետրվարի 19-ին Բուդապեշտում ադրբեջանցի ոճրագործ սպա Ռամիլ Սաֆարովը կացնահարեց Հայաստանի ԶՈւ սպա Գուրգեն Մարգարյանին քնած ժամանակ: Սպաները Հունգարիայի մայրաքաղաքում մասնակցում էին անգլերենի դասընթացներին ՆԱՏՕ-ի ծրագրի շրջանակում: Հունգարիայի դատարանը դատապարտեց Ռամիլ Սաֆարովին ցմահ բանտարկության առանց ներման իրավունքի առաջին 30 տարիներին: 2012թ-ի օգոստոսի 31-ին Հունգարիայի իշխանությունները որոշում կայացրին արտահանձնել Սաֆարովին Ադրբեջանին: Ադրբեջան արտահանձնվելուց հետո ոճրագործն արժանացավ նախագահ Իլհամ Ալիեւի ներմանը, նրան շնորհեցին մայորի կոչում, ապահովեցին բնակարանով, անձնագրով եւ հերոսացրին: Միջազգային տարբեր կառույցներ, գերտերություններ հանդես եկան Ադրբեջանի քայլը դատապարտող հայտարարություններով:Հայաստանը կասեցրեց դիվանագիտական հարաբերությունները Հունգարիայի հետ: