2 րոպեի ընթերցում
ԵՐԵՎԱՆ, 14 ՕԳՈՍՏՈՍԻ, ԱՐՄԵՆՊՐԵՍ: Հայ անվանի բանաստեղծ Վահագն Դավթյանի մահից 16 տարի անց բանաստեղծի ապրած տանը՝ Նաիրի Զարյան 80 հասցեում, օգոստոսի 15-ին բացվեց նրա դիմաքանդակ-հուշաքարը: Նշված հասցեում բանաստեղծն ապրել եւ ստեղծագործել է 1952-1996 թվականներին: Մինչ այդ Դավթյանի արվեստի երկրպագուներն ու հարազատները ծաղիկներ դրեցին նրա շիրիմին` Կոմիտասի անվան զբոսայգու պանթեոնում:
«Ճիշտ այն տրամադրությամբ եմ եկել, ինչ տրամադրությամբ ամեն անգամ այցի եմ գալիս մեր գրականության, մշակույթի դասականներին` մտովի վերհիշելով եւ վերագնահատելով նրանց»,- «Արմենպրես»-ի ն ասաց Հայաստանի գրողների միության նախագահ Լեւոն Անանյանը: Անանյանը Վահագն Դավթյանին բացառիկ երեւույթ է համարում` եւ որպես բանաստեղծ, եւ որպես մարդ:«Նոր սերնդի համար ինտենետային աղբանոցի մեջ` Դավթյանի պոեզիան վերադարձ է դեպի նախնական, բարոյական զուլալ ակունունքները»,- հավելեց գրողների միության նախագահը:
Վահագն Դավթյանի Արաբկիր վարչական շրջանում գտնվող տանն այժմ բնակվում են նրա դուստրերը եւ թոռնիկները:«Այս տարիներին նա կարծես անընդհատ մեզ հետ է, ցավոք սրտի այնպիսի հիվանդությամբ էր հիվանդ, որ չկարողացավ երկար ապրել, ուրախ եմ, որ 16 տարի հետո հուշաքար կբացվի մեր տան պատին»,- ասաց բանաստեղծի կրտսեր դուստրը` Հասմիկ Դավթյանը:
«Դիմաքանդակում փորձել եմ արտահայտել այն, ինչ զգացել եմ, նրա արծվային հայացքը, խոր, իմաստուն աչքերը: Դավթյանը մտածող էր, փիլիսոփա, իսկական արաբկիրցի»,- «Արմենպրես»-ին ասաց Դավթյանի հուշաքարը հեղինակած քանդակագործ Լեւոն Թոքմաջյանը:
Վահագն Դավթյանի ծննդյան 90- ամյակի առթիվ հուշաքարի բացման արարողությանը ներկա էր Երեւան քաղաքիԱրաբկիր վարչական շրջանի ղեկավար Հրայր Անտոնյանը, մշակութային եւ հասարակական գործիչներ:
Առաջիկայում նախատեսվում է ստեղծել «Վահանգն Դավթյան» հիմնադրամ, ինչպես նաեւ հրատարակել նրա մինչեւ այժմ չհրատարակված գործերը: