2 րոպեի ընթերցում
ԵՐԵՎԱՆ, 9 ՕԳՈՍՏՈՍԻ, ԱՐՄԵՆՊՐԵՍ: ԱՄՆ-ը, որպես ԵԱՀԿ Մինսկի խմբում համանախագահող պետություն, հակված է շարունակել աշխատանքը Հայաստանի և Ադրբեջանի հետ՝ Լեռնային Ղարաբաղի հակամարտության խաղաղ, կայուն և արդարացի լուծման ուղղությամբ: Ինչպես հաղորդում է «Արմենպրես»-ը, նման հայտարարությամբ հանդես է եկել Ադրբեջանում ԱՄՆ դեսպանատունը՝ մեկնաբանելով օրերս Մասաչուսեթս նահանգի Ներկայացուցիչների պալատի կողմից Արցախի անկախությունը սատարող բանաձևի ընդունումը:
Դեսպանատան հայտարարության մեջ միաժամանակ շեշտվում է, որ առանձին նահանգների ընդունած բանաձևերը չեն կարող կանխորոշել ԱՄՆ-ի արտաքին քաղաքականությունը, սակայն յուրաքանչյուր նահանգ ազատ է այս կամ այն բովանդակությամբ բանաձև ընդունել:
ԱՄՆ Մասաչուսեթս նահանգի Ներկայացուցիչների պալատնօգոստոսի 6-ինընդունել է Ներկայացուցիչների պալատի անդամ Ջոնաթան Հեչթի հեղինակած բանաձևը, որով ԱՄՆ նախագահին և Կոնգրեսին կոչ է արվում սատարել Լեռնային Ղարաբաղի ինքնորոշումն ու անկախությունը: Բանաձևը դատապարտում է հայերի կոտորածները Սումգայիթում, Կիրովաբադում, Բաքվում, ինչպես նաև բռնարարքները, որ Ադրբեջանը կիրառել է Լեռնային Ղարաբաղի ինքնորոշումը պահանջող խաղաղ ցուցարարների հանդեպ: Փաստաթուղթը շեշտում է, որ Ադրբեջանն իր թշնամական քայլերով ներկայում նույնպես շարունակում է սպառնալ Լեռնային Ղարաբաղի անվտանգությանը: Բանաձևը բարձր է գնահատում, որ Լեռնային Ղարաբաղի ժողովուրդը, չնայած շարունակական բռնություններին, 1991թ. դեկտեմբերի 10-ին համաժողովրդական հանրաքվեի միջոցով քվեարկեց հօգուտ անկախության, ազատության և ժողովրդավարության: Փաստաթուղթը ողջունում է Լեռնային Ղարաբաղի արձանագրած հաջողությունները ժողովրդավարության կառուցման ասպարեզում և այդ առումով մեծ քայլ է գնահատում 2012թ. հուլիսի 19-ին կայացած նախագահական ընտրությունները: