2 րոպեի ընթերցում
ԵՐԵՎԱՆ, 25 ՀՈՒՆԻՍԻ, ԱՐՄԵՆՊՐԵՍ: Լեհաստանում եւ Ուկրաինայում անցկացվող ֆուտբոլի Եվրոպայի առաջնությունը գերազանցել Է հաճախելիության ռեկորդը: Այդ մասին, ինչպես տեղեկացնում Է «Արմենպրես»-ը, հաղորդել Է «Ուկրաինա-2012» տեղեկատվական կենտրոնը: Ընդհանուր առմամբ խմբային մրցախաղերին եւ քառորդ եզրափակիչի խաղերին այցելել Է 1 մլն 274 հազար 186 մարզասեր: Սպասվում Է, որ հանրագումարային հաճախելիությունը կգերազանցի 1,4 միլիոնը:
Տեղեկատվական կենտրոնի տվյալներով՝ միայն առաջնության եզրափակիչ խաղի համար արդեն վաճառվել Է 65 հազար տոմս: Մարզադաշտերի միջին հաճախելիությունը ներկա պահին կազմում Է 45 հազար 507 մարզասեր:
Ավելի վաղ հաճախելիության ռեկորդը պատկանում Էր 1996 թվականին Անգլիայում անցկացված Եվրոպայի առաջնությանը. այն այցելել Էր ավելի քան 1,27 մլն մարզասեր: Անցյալ տարի Ավստրիայում եւ Շվեյցարիայում անցկացված առաջնության խաղերին այցելել Է 1,14 մլն մարդ:
Թեեւ Լեհաստանում եւ Ուկրաինայում անցկացվող առաջնությունը ռեկորդային Է դարձել հաճախելիության ցուցանիշով, շատ խաղերի ժամանակ տրիբունաներում բազմաթիվ ազատ տեղեր են լինում: Օրինակ՝ հունիսի 24-ին Իտալիայի եւ Անգլիայի միջեւ քառորդ եզրափակիչի հանդիպման ժամանակ Կիեւի «Օլիմպիյսկի» մարզադաշտի տրիբունաներում, որը 70 հազար մարդ Է տեղավորում, մեծ թվով ազատ տեղեր կային:
Ֆուտբոլի 2012 թվականի առաջնությունն անցկացվում Է ութ քաղաքներում՝ Կիեւում, Դոնեցկում, Խարկովում եւ Լվովում (Ուկրաինա) եւ Վարշավայում, Գդանսկում, Պոզնանում ու Վրոցլավում (Լեհաստան):