2 րոպեի ընթերցում
ԵՐԵՎԱՆ, 22 ՀՈՒՆԻՍԻ, ԱՐՄԵՆՊՐԵՍ:ՀՀ ոստիկանության պետ Վլադիմիր Գասպարյանը ևՀայաստանի Հանրապետությունում ԱՄՆ արտակարգ եւ լիազոր դեսպան Ջոն Հեֆերնը հունիսի 22-ին բացեցին ԱՄՆ կառավարության կողմից ՀՀ իրավապահ համակարգին նվիրաբերած նորակառույց հրաձգարանը: Ինչպես հաղորդում է «Արմենպրես»-ը, դեսպանն ու ոստիկանապետը շրջեցին հրաձգարանում եւ ծանոթացան կատարված աշխատանքներին: «ԱՄՆ կառավարությունն ուրախ է օժանդակել Հայաստանին` իրավապահ մարմինների կարողությունը հզորացնելու եւ հմտությունները զարգացնելու գործում: Այս հրաձգարանն ամենաբարդ բաղկացուցիչ մասերից է անձնակազմի պատրաստման գործում»,-նկատեց Հեֆերնը: Նա ընդգծեց, որ ՀՀ ոստիկանությունը կառուցում է մի համակարգ, որը նպաստում է կարեւոր մի գործի` վստահություն ստեղծել ժողովրդի եւ ոստիկանի միջեւ:
Վլադիմիր Գասպարյանն ավելացրեց, որ ԱՄՆ դեսպանատան հետ ՀՀ ոստիկանությունը շատ ներդաշնակ է աշխատում: «Մենք ուզում ենք ստեղծել նորմալ, արդար, ազնիվ ոստիկանություն եւ ձեր անձնական դերն այստեղ շատ բարձր եմ գնահատում: Շնորհակալ ենք ԱՄՆ կառավարությանը, որ ճգնաժամի պայմաններում գտնում է միջոցներ եւ բարեկամական, բարոյական խնդիրներ է լուծում»,-նշեց Գասպարյանը:
Ոստիկանապետն ու դեպսանը աշխատանքներին ծանոթանալուց հետո դարձան հրաձգարանի առաջին նշանառուները:
Հրաձգարանի երկարությունը 50 մետր է: Ունի շարժական թիրախների համակարգ, ինչպես եւ վարչական գրասենյակներ եւ ծառայողական տարածք: Այն կարող է օգտագործվել իրավապահ համակարգի բոլոր գերատեսչությունների աշխատակիցների վերապատրաստման համար:Շինարարական աշխատանքների արժեքը մոտ 760 հազար դոլար է, ֆինանսավորումը` ԱՄՆ պետքարտուղարության Թմրամիջոցների դեմ պայքարի եւ իրավապահ համագործակցության բյուրոյի կողմից: ԱՄՆ կառավարության աջակցությունն` ուղղված Հայաստանի իրավապահ եւ քրեադատավարական ոլորտին, տարեկան կազմում է մոտ երեք միլիոն ԱՄՆ դոլար: