2 րոպեի ընթերցում
ԵՐԵՎԱՆ, 15 ՀՈՒՆԻՍԻ, ԱՐՄԵՆՊՐԵՍ: Ադրբեջանից հայ փախստականները պատրաստվում են քաղաք կառուցել Զանգելանի հարակից տարածքում: Հունիսի 15-ին լրագրողների հետ հանդիպմանը նման հայտարարությամբ հանդես եկավ Ադրբեջանական ԽՍՀ-ից փախստականների համագումարի նախագահության անդամ Մարիամ Ավագյանը: «Ազատագրված տարածքներում հայ փախստականներն իրենց իրավունքներն իրականացնելու համար կառուցելու են քաղաք: Ազատագրված տարածքներում մենք լիարժեք իրավատեր ենք»,-նշեց Ավագյանը:
Նրա խոսքով` քաղաքը կոչելու են Բագարան, որը կունենա 100 հազար բնակիչ: Նրանք կապահովվեն բարձր աշխատավարձով աշխատատեղերով:Ավագյանն ընդգծեց, որ քաղաքի կառուցման համար կատարվում են քայլեր` համաձայնության գալով մի շարք կազմակերպությունների եւ արցախյան իշխանությունների հետ, որոնք դրականորեն են արձագանքել:
Քաղաքի կառուցման անհրաժեշտ ֆինանսավորումը կկատարվի Ռուսաստանում, ԱՄՆ-ում բնակվող ապահովված փախստականների կողմից:«Արմենպրես»-ի հարցին պատասխանելով` Ավագյանը նշեց, որ քաղաքի կառուցման հարցը բավական իրատեսական է: Կա ճարտարապետական նախագիծ` թե որ գետի ափին է կառուցվելու, որքան ծախս է հարկավոր, ինչ տիպի աշխատանքային գործունեություն է անհրաժեշտ, ինչ հարաբերություններ պետք է ունենա քաղաքը հարեւան ժողովուրդների հետ: «Հիմա խնդիրը վերաբերում է այս տարածքներում մեր իրավատեր լինելու փաստի արձանագրմանը, եւ արցախյան իշխանությունները պետք է ավելի վստահ գործեն»,-նկատեց Ավագյանը:
Նա հույս հայտնեց, որ Բագարանը լինելու է ավելի գեղեցիկ, քան Բաքուն, այն լինելու է ազատ տնտեսական գոտի եւ խաղաղության խորհրդանիշ, տարածաշրջանի ժողովուրդների երկխոսության քաղաք: