2 րոպեի ընթերցում
ԵՐԵՎԱՆ, 2 ՄԱՐՏԻ, ԱՐՄԵՆՊՐԵՍ: Պատիժը կրելուց վաղաժամկետ ազատման համակարգին նվիրված հետազոտության արդյունքները, որն անցկացվել է 2011 թվականի մայիս-սեպտեմբեր ժամանակահատվածում, ներկայացվեց մարտի 2-ին:
Հետազոտությունն անցկացվել է «Քաղաքացիական հասարակության ինստիտուտ» ՀԿ-ի կողմից` ԵԱՀԿ երեւանյան գրասենյակի աջակցությամբ: Նպատակն է խթանել քրեական արդարության ոլորտի բարեփոխումները եւ նպաստել ազատազրկման ձեւով պատիժ կրող դատապարտյալների թվի նվազմանը:
«Արմենպրես»-ի հաղորդմամբ` ԵԱՀԿ երեւանյան գրասենյակի մարդու իրավունքների հարցերով պատասխանատու Վլադիմիր Չունտոլովը նշեց, որ դատապարտված անձինք հաճախ իրենց դժգոհությունն են հայտնում Հայաստանում վաղաժամկետ ազատման մեխանիզմի վերաբերյալ:
«Վաղաժամկետ պայմանական ազատումը պետք է մատչելի լինի բոլոր դատապարտյալների համար, այդ թվում` ցմահ: Ես հուսով եմ, որ հետազոտության մեջ տեղ գտած առաջարկությունները կնպաստեն համակարգի բարելավմանը»,- ասաց Չունտոլովը:
«Քաղաքացիական հասարակության ինստիտուտ» ՀԿ-ի նախագահ Արման Դանիելյանի խոսքով` պայմանական վաղաժամկետ ազատման համակարգի բարեփոխումը մի քանի տարիների անընդմեջ աշխատանք է պահանջում:
«Անհրաժեշտ է ներդնել նոր գործիքներ, ստեղծել անկախ պրոբացիայի ծառայություն, որտեղ կաշխատեն հատուկ ուսուցում ստացած մասնագետներ»,-ասաց նա: