2 րոպեի ընթերցում
ԵՐԵՎԱՆ, 23 ՀՈՒՆՎԱՐԻ, ԱՐՄԵՆՊՐԵՍ: Սոչիում կայացել է Ռուսաստանի Դաշնության նախագահ Դմիտրի Մեդվեդևի և ՀՀ նախագահ Սերժ Սարգսյանի հանդիպումը: Ինչպես հաղորդում է «Արմենպրես»-ը՝ վկայակոչելով Կրեմլի պաշտոնական կայքը, կողմերը քննարկել են հայ-ռուսական երկկողմ հարաբերություններին առնչվող մի շարք խնդիրներ:
«Ձմռանը Սոչիում հանդիպելը մեզ համար արդեն բարի ավանդույթ է դարձել: Անցած տարին մեր հարաբերությունները նշանավորվեցին ռազմա-տեխնիկական և տնտեսական հարաբերությունների զարգացմամբ»,- նշել է Դմիտրի Մեդվեդեևը: Անդրադառնալով հարաբերությունների զարգացման հեռանկարներին՝ ՌԴ նախագահը շեշտել է, որ կողմերը պետք է ուշադրությունը սևեռեն մեծ ծրագրերի վրա:
Բացի երկկողմ հարաբերություններից, կողմերը քննարկելու են նաև տարածաշրջանային մի շարք խնդիրներ: «Տարածաշրջանում կան մի շարք բարդ մարտահրավերներ: Մենք Ձեզ հետ կշարունակենք քննարկել տարածաշրջանային ամենաբարդ խնդիրներից մեկը՝ Լեռնային Ղարաբաղի հակամարտության կարգավորումը, արդեն մեր ադրբեջանական գործընկերոջ հետ միասին»,- ասել է Մեդվեդևը:
ՀՀ Նախագահ Սերժ Սարգսյանը շնորհակալություն է հայտնել իր ռուսաստանցի գործընկերոջը Լեռնային Ղարաբաղի հարցի կարգավորմանն ուղղված իր ջանքերի համար՝ նշելով, որ հենց այդ ջանքերն են, որ թույլ են տալիս հարավային Կովկասում ունենալ քիչ թե շատ կայուն իրավիճակ:
«Այս հանդիպումները նաև լավ հնարավորություն են քննարկելու մեր երկկողմ հարաբերությունները: Ես լիովին կիսում եմ Ձեր այն կարծիքը, որ անցած տարին մենք վատ չենք ավարտել՝ ապրանքաշրջանառություն աճել է 15 տոկոսով, ինչը նշանակալի արդյունք է»,- ասել է Սերժ Սարգսյանը: