Սնկի աճեցման նոր ջերմոց է կառուցվում Արմավիրում
3 րոպեի ընթերցում
![Սնկի աճեցման նոր ջերմոց է կառուցվում Արմավիրում](http://armenpress.am/resized/480/static/news/b/2012/01/675170.jpg)
ԵՐԵՎԱՆ, 13 ՀՈՒՆՎԱՐԻ, ԱՐՄԵՆՊՐԵՍ: ՀՀ Նախագահ Սերժ Սարգսյանը Արմավիրի մարզ կատարած աշխատանքային այցի շրջանակներում այցելեց «Ամստեր ֆլաուերս» և «Բիգա» հայ-հոլանդական համատեղ ձեռնարկությունների ջերմոցներ: Ինչպես հաղորդում է «Արմենպրես»-ը, Հանրապետության ղեկավարը շրջեց լոլիկի, վարունգի և պղպեղի ջերմոցներում, ծանոթացավ ևս մեկ սնկանոցի կառուցման աշխատանքներին:
«Մեր արտադրանքը հիմնականում նախատեսված է տեղական շուկայի համար: Մենք ձգտելու ենք լրացնել այն վակուումը, որը ներկայում հիմնականում լցվում է ներկրման միջոցով»,- նշեց «Ամստեր Ֆլաուերս» և «Բիգա» հայ-հոլանդական համատեղ ձեռնարկության համասեփականատեր Սամվել Պետրոսյանը: Նրա խոսքով՝ ներկրվումէ հաճախ անհայտ ծագման արտադրանք, իսկ տեղական արտադրանքի որակը երաշխավորված է: Սամվել Պետրոսյանը հավաստիացրեց, որ հիվանդություններից խուսափելու համար իրենց ընկերությունն օգտագործում է միայն կենսաբանական ծագման միջոցներ: Մոտ տասն օր հետո ընկերության առաջին արտադրանքը դուրս կբերվի տեղական շուկա: Ջերմոցներում աշխատանքը մեծ մասամբ ավտոմատացված է: Ներկայում այնտեղ աշխատում է 21 մարդ, իսկ ընկերության` արդենգործող սնկանոցում աշխատում է 26 մարդ, իսկ երկրորդի գործարկումից հետո նրանից թիվը կհասնի 40-ի: Միջին աշխատավարձը կազմում է 80 հազար դրամ:
Ընկերության հոլանդացի համասեփականատեր Միշել Լակրուայի խոսքով՝ ջերմոցի կառուցման աշխատանքների ընդհանուր արժեքը կազմել է 1.5 մլն եվրո: Նախնական հաշվարկներով՝ մեկ քմ մակերեսից լոլիկի բերքատվությունը կկազմի 40-50 կգ: Բերքի աճեցման ընթացքն իրականացվում է համակարգչային հսկողությամբ:
Հայ-հոլանդական համատեղ ձեռնարկությունը հիմնադրվել է 2006թ-ից՝ 500 հազար եվրո ընդհանուր մեկնարկային կապիտալով: Ձեռնարկության հիմնադիր անդամներից երկուսը Հոլանդիայի քաղաքացիներ են, ովքր մեծ փորձ և մասնագիտական հիմնավոր գիտելիքներ ունեն բույսերի աճեցման բնագավառում: Ընկերությունը զբաղվում է նաև վարդերի, մշտադալար բույսերի, պտղատու ծառերիկ, միամյա և բազմամյա բույսերի, ինչպես նաև սենյակային էկզոտիկ բույսերի աճեցմամբ:
«Բիգա» ընկերության երկրորդ սնկանոցի կառուցումից հետո սնկանոցների ընդհանուր միջին արտադրանքը կկազմի 2000 կգ, ինչի շնորհիվ կավելանան ինչպես արտահանման, այնպես էլ ներքին սպառման ծավալները: 2012թ-ից նախատեսվում է աճեցնել նաև ազնվամորի և ելակ: