ՀՀ Նախագահն այցելեց Վանանդ համայնքի վերանորոգված դպրոց
1 րոպեի ընթերցում
![ՀՀ Նախագահն այցելեց Վանանդ համայնքի վերանորոգված դպրոց](http://armenpress.am/resized/480/static/news/b/2012/01/675152.jpg)
ԵՐԵՎԱՆ, 13 ՀՈՒՆՎԱՐԻ, ԱՐՄԵՆՊՐԵՍ: ՀՀ Նախագահ Սերժ Սարգսյանը Արմավիրի մարզ կատարած աշխատանքային այցի ընթացքում այցելեց Վանանդ համայնքի միջնակարգ դպրոց, որի մասնաշենքներից մեկըվերջերս է վերանորոգվել: Ինչպես հաղորդում է «Արմենպրես»-ը, հանրապետության ղեկավարը շրջեց նոր վերանորոգված մասնաշենքում:
Վանանդի դպրոցի տնօրեն Հայկ Խաչիկյանը նշեց, որ վերանորոգումը կատարվել է Սոցիալական ներդրումների հիմնադրամի և համայնքի միջոցներով: Ընդհանուր առմամբ ներդրվել է 70-75 մլն դրամ: Նրա խոսքով՝ ներկայիս պայմաններով արդեն դպրոցը լիովին կարող է քաղաքակիրթ հնարավորություններ ապահովել իր 140 աշակերտների և 22 ուսուցիչների համար: «Ստացել ենք նոր գույք, կահավորվել են քիմիայի, ֆիզիկայի և կենսաբանության լաբորատորիաները»,- նշեց դպրոցի տնօրենը: Խաչիկյանը նաև ընդգծեց, որ Վանանդի դպրոցը մարզի այն եզակի դպրոցներից է, որտեղ կա աշակերտների թվի աճի միտում:
«Փյունիկ» բարեգործական հիմնադրամի կողմից դպրոցին տրամադրվել է 8 համակարգիչ: