Այրված ավտոմեքենայի միջից հայտնաբերվել է 3 տղամարդու դիակ

ԵՐԵՎԱՆ, 8 ԴԵԿՏԵՄԲԵՐԻ, ԱՐՄԵՆՊՐԵՍ: ՀՀ արտակարգ իրավիճակների նախարարություն դեկտեմբերի 7-ին' ժամը 21.58-ին, Վայոց ձորի մարզից տեղեկություն է ստացվել, որ Ջերմուկ քաղաքի Ձախափնյա թաղամասի Մաշտոցի փողոցում տեղի է ունեցել ավտոպատահար: «Մոսկվիչ 2715» մակնիշի ավտոմեքենան դուրս է եկել ճանապարհի երթեւեկելի մասից եւ բախվել թիվ 7 շենքի հարակից ավտոկանգառի մետաղյա ճաղավանդակին: Վարորդը տեղափոխվել է հիվանդանոց: Բժիշկները նրաա առողջական վիճակը գնահատել են բավարար:

Նույն օրը' ժամը 23.54-ին, Ալմաստ գործարանի մոտակայքում տեղի է ունեցել ավտոճանապարհատրանսպորտային պատահար: Ինչպես «Արմենպրես»-ին տեղեկացրին Արտակարգ իրավիճակների նախարարությունից, դեպքի վայր է մեկնել երկու մարտական հաշվարկ: Իրար են բախվել «ԲՄՎ-525» մակնիշի եւ «ՎԱԶ2102» մակնիշի ավտոմեքենաները, ինչի արդյունքում «ՎԱԶ2102»-ը բռնկվել է: Այրված ավտոմեքենայի միջից հայտնաբերվել է 3 տղամարդու դիակ, որոնց ինքնությունը պարզվել չի հաջողվել: