3 րոպեի ընթերցում
ԵՐԵՎԱՆ, 2 ԴԵԿՏԵՄԲԵՐԻ, ԱՐՄԵՆՊՐԵՍ: Նյու Յորքում տեղակայված ՄԱԿ-ի Գլխավոր ասամբլեայում նոյեմբերի 30-ին տեղի են ունեցել Միավորված ազգերի կազմակերպության ռասայական խտրականության վերացման կոմիտեի անդամների ընտրությունները, որոնց մասնակցում էր նաեւ Ադրբեջանը: Ինչպես հաղորդում է «Արմենպրես»-ը, ՄԱԿ-ի այս փորձագիտական կոմիտեն իրականացնում է Ռասայական խտրականության բոլոր ձեւերի վերացման դաշնագրի անդամ պետությունների կողմից այդ միջազգային փաստաթղթի կիրառման վերահսկողությունը, բացի այդ քննարկում պետությունների կողմից ներկայացված զեկույցները, այս առթիվ առկա խնդիրներն ու մտահոգությունները: Կոմիտեի իրավասության ներքո են գործում վաղ նախազգուշացման ընթացակարգը, միջպետական ու անհատական զգուշացման բողոքարկումների մեխանիզմները:
Հետաքրքրական է, որ ընտրություններին մասնակցելու համար թեկնածություն էր ներկայացրել Ադրբեջանը, մի երկիր որտեղ բացահայտորեն քարոզվում ու խարխուսվում է ռասիզմն ու դրա բոլոր ձեւերը հարեւան ժողովուրդների նկատմամբ, ինչը բազմիցս դատապարտվել է նաեւ միջազգային հանրության, մասնավորապես, Եվրոպայի խորհրդի կողմից:
Վերջերս այս թեմայով ՄԱԿ-ում ելույթ էր ունեցել նաեւ Հայաստանի դեսպան Կարեն Նազարյանը, ով կազմակերպության անդամ երկրների ուշադրությունն էր հրավիրել հայատյացությունը Բաքվի կողմից վտանգավոր պետական քարոզչություն հռչակելու մասին փաստերին: Դեսպանը մասնավորապես նշել էր, որ Ադրբեջանի կողմից ռասայական խտրականության դրսեւորումներն ու ձեւերը վտանգում են վստահության մթնոլորտի ձեւավորման գործընթացն ու հետեւաբար վնասում Լեռնային Ղարաբաղի կարգավորման բանակցային գործընթացին:
Ադրբեջանը ընտրություններում ջախջախիչ պարտություն կրեց, ինչը, կարելի է օրինաչափ համարել: Այն նաեւ սառը ցնցուղի դեր կատարեց ադրբեջանական գլուխգովանների համար, որոնք Անվտանգության խորհրդի ընտրություններից հետո էյֆորիայի մեջ էին ընկել:
Այս պարտությունը միջազգային հանրության յուրատեսակ պատգամն էր առ այն, որ պետական մակարդակով ռասիզմի եւ ռասայական խտրականության քաղաքականություն քարոզելը համարվում է հանցագործություն ուրիշների, իսկ երկարժամկետ առումով նաեւ սեփական ժողովրդի ու ապագա սերունդների հանդեպ: