1 րոպեի ընթերցում
ԵՐԵՎԱՆ, 16 ՍԵՊՏԵՄԲԵՐԻ, ԱՐՄԵՆՊՐԵՍ: Երեւանի «Կասկադ» համալիրի ձախակողմյան մասում հոկտեմբերին կբացվի աշխարհահռչակ երգիչ, երգահան Շառլ Ազնավուրի տուն-թանգարանը: Ինչպես «Արմենպրես»-ին տեղեկացրին Երեւանի քաղաքապետարանի տեղեկատվության եւ հասարակայնության հետ կապերի վարչությունից, Շառլ Ազնավուրի տուն-թանգարանի շենքի կառուցումն ավարտված է, այժմ ընթանում են բարեկարգման, ինչպես նաեւ ներքին հարդարման աշխատանքները:
Անդրադառնալով «Արմենպրես»-ի այն հարցին, թե արդյոք սպասվում է տուն-թանգարանի բացման արարողությանը Շ. Ազնավուրի մասնակցությունը, լրատվական վարչությունից պատասխանեցին, որ շանսոնյեն դեռեւս շինարարության ընթացքում եղել է թանգարանում եւ հավանության արժանացրել այն: Ինչ վերաբերում է թանգարանի բացման կոնկրետ օրվան եւ մասնակիցներին, այդ մասին լրացուցիչ տեղեկատվություն կտրամադրվի ավելի ուշ: