Անկախության 20-ամյակին նվիրված զորահանդեսում կներկայացվի նախկինում չցուցադրված 4-5 տեսակի ռազմական տեխնիկա
1 րոպեի ընթերցում
![Անկախության 20-ամյակին նվիրված զորահանդեսում կներկայացվի նախկինում չցուցադրված 4-5 տեսակի ռազմական տեխնիկա](http://armenpress.am/resized/480/static/news/b/2011/09/663172.jpg)
ԵՐԵՎԱՆ, 13 ՍԵՊՏԵՄԲԵՐԻ, ԱՐՄԵՆՊՐԵՍ: Հայաստանի Հանրապետության անկախության 20-ամյա հոբելյանին նվիրված զորահանդեսի նկատմամբ մեծ հետաքրքրությունը պայմանավորված է նրանով, որ հարեւան Ադրբեջանը ռազմական մրցավազք է սկսել ընդդեմ Հայաստանի: Այս մասին «Արմենպրես»-ի հետ զրույցում նշեց ռազմական փորձագետ Արծրուն Հովհաննիսյանը' հավելելով, որ այդ զորահանդեսը ոչ միայն պատասխան է Ադրբեջանին, այլեւ հնարավորություն' ապացուցելու հայ հանրությանը, որ Հայաստանը ոչնչով չի զիջում ռազմական գերակայության մասին հոխորտացող թշնամուն:
«Զորահանդեսը ցույց կտա, որ մենք ունենք ռազմական տեխնիկայի որոշ միավորներ, որոնք չունի հակառակորդը, ինչու չէ' նաեւ' հակառակը, սակայն այն երեքից-չորս տեսակի ռազմական տեխնիկան, որը կցուցադրվի առաջին անգամ, կտա բոլոր հարցերի պատասխանները»,- նշեց փորձագետը' հավելելով, որ այդ ռազմական միավորները գաղտնի չէին, պարզապես դրանք երբեք բացահայտ կերպով չեն ցուցադրվել: «Հասարակության մեջ կա մի շերտ, որը միշտ կարիք ունի սեփական բանակի հզորության փաստացի ապացույցների, մինչդեռ իրականում պետք է հասկանալ, որ նման ռազմական շքերթները ոչինչ չեն փոխում»,-ասաց Ա. Հովհաննիսյանը: