1 րոպեի ընթերցում
ԵՐԵՎԱՆ, 10 ՀՈւՆԻՍԻ, ԱՐՄԵՆՊՐԵՍ: ԱՄՆ Ռոդ Այլենդ նահանգի Գլխավոր վեհաժողովը (խորհրդարան) օրենք է ընդունել, որով նահանգային կրթական դեպարտամենտը պարտավորվում է օժանդակել դպրոցներում ցեղասպանության թեմայի դասավանդմանը: Ինչպես հաղորդում է «Արմենպրես»-ը' վկայակոչելով «Ասոշիեյթեդ պրես»-ը, ընդունված օրենքով կրթական դեպարտամենտից պահանջվում է իր կայքէջում տեղադրել ցեղասպանություններին վերաբերող ուսումնական նյութեր' ներառյալ Հոլոքոսթը, Հայոց ցեղասպանությունը, Կամբոջայում, Դարֆուրում, Իրաքում եւ Ռուանդայում իրականացված ցեղասպանությունները:
Օրինագծի համահեղինակներն են Անաստասիա Ուիլյամսը եւ Ջոշուա Միլերը: Կառավարությունների կողմից մարդու իրավունքների ոտնահարումները որակելով «պատմության գարշելի գլուխներ»' Ա.Ուիլյամսն ընդգծել է, որ ուսանողները պետք է սովորեն դրանց մասին' կանխելու սխալների կրկնությունը:
Ռոդ Այլենդի նահանգային խորհրդարանը 2000 թվականին ընդունել էր օրենք, որով նահանգի կրթության ոլորտի պաշտոնյաներից պահանջվում էր ուսումնական պլան մշակել ցեղասպանության եւ մարդու իրավունքների թեմաներով:
Ռոդ Այլենդը Հայոց ցեղասպանությունը ճանաչած եւ դատապարտած ԱՄՆ չորս տասնյակից ավելի նահանգներից է: