2 րոպեի ընթերցում
ԵՐԵՎԱՆ, 23 ԱՊՐԻԼԻ, ԱՐՄԵՆՊՐԵՍ (թղթ. Ռոզա Հովհաննիսյան): Այսօր լրանում է Հայաստանի առաջին կին վաստակավոր ճարտարապետ Աննա Տեր-Ավետիքյանի ծննդյան 100- ամյակը: Հոբելյարին շնորհավորել են Երեւանի քաղաքապետ Երվանդ Զախարյանը, շինարարներ, ճարտարապետների միության, ոստիկանության ներկայացուցիչներ եւ այլոք: Ա. Տեր-Ավետիքյանն աշխատել է Ալեքսանդր Թամանյանի եւ Նիկողայոս Բունիաթյանի արվեստանոցներում, կատարել մեծ եւ արդյունավետ աշխատանք մայրաքաղաքի քաղաքաշինական կյանքում: Ինչպես «Արմենպրեսե-ին տեղեկացրին Երեւանի քաղաքապետարանից, մայրաքաղաքի ճարտարապետական տեսքի ձեւավորման ու բազմաթիվ ներկայանալի կառույցների նախագծման գործում մեծ ներդրումն ունենալու համար Ա. Տեր-Ավետիքյանն արժանացել է Երեւանի քաղաքապետի ոսկե մեդալին: Հայ անվանի ճարտարապետի խոսքերով` իր գլխավոր նպատակը միշտ եղել է հայկական դասական ճարտարապետության, ազգային ավանդույթների պահպանումն ու շարունակումը: Նրա հեղինակությամբ կառուցվել են Երեւանի ներկայանալի շենքերից շատերը` Կորյունի փողոցի եւ Մաշտոցի պողոտայի անկյունում գտնվող կինեմատոգրաýիստների բնակելի տունը` նշանավոր «Պոնչիկանոցըե, Լեզվի ինստիտուտի շենքերը, նախկին քաղաքային դումայի շենքը Շահումյան հրապարակում եւ բազմաթիվ այլ կառույցներ: Երեւանի քաղաքապետը տեղեկացրել է, որ նախատեսվում է հրատարակել Ա. Տեր- Ավետիքյանի մասին գիրք, իսկ նրա նախագծած շենքերից մի քանիսի պատերին կփակցվի հեղինակի անունը: