2 րոպեի ընթերցում
ՆԱՅՐՈԲԻ, 25 ՀՈՒԼԻՍԻ, ԱՐՄԵՆՊՐԵՍ: Շուրջ 1 տարի տեւած հետաքննությունից հետո Քենիայի իշխանությունները որոշել են դատարան փոխանցել Արթուր Մարգարյանի եւ Արթուր Սարգսյանի գործը: Քենիայի նախագահ Մվայի Քիբակի հրահանգով ստեղծված հատուկ հետաքննող խումբը բացահայտել է Ա.Սարգսյանի ու Ա.Մարգարյանի հանցավոր կապերը Քենիայի մաքսային եւ միգրացիոն ծառայությունների, ոստիկանության բարձրաստիճան պաշտոնյաների ու քաղաքական գործիչների հետ: Նրանք նաեւ մեղադրվում են փաստաթղթերի կեղծման, թմրանյութերի տեղափոխման եւ փողի լվացման հարցում: Հիշեցնենք, որ անցած տարվա մարտին Քենիայի ընդդիմության առաջնորդներից մեկը հայազգի եղբայրներին մեղադրեց, թե նրանք որպես վարձկաններ օգտագործվել են Քենիայի իշխանությունների կողմից որոշ լրատվամիջոցների վրա հարձակումներ գործելու համար: Դրանից հետո նրանք մայրաքաղաք Նայրոբիի օդակայանում ասուլիս հրավիրեցին ՝ հայտարարելով. «Մենք վարձկաններ չենք, բայց եթե նույնիսկ լինեինք, ձեր կառավարությունը բավարար փող չէր ունենա մեզ վարձելու համարե: Անցած տարվա հուլիսի սկզբին նրանք փորձել են մեկնել Քենիայից, ընդ որում նրանց հովանավորել էր Քենիայի Ջրային ռեսուրսների նախարարության բարձրաստիճան պաշտոնյա Ուինի Վանգուին: Նա զանգահարել էր մայրաքաղաք Նայրոբիի օդակայան եւ խնդրել եղբայրներին անցկացնել բարձրաստիճան պաշտոնյաների եւ պատվավոր հյուրերի համար նախատեսված սրահով: Դրանից հետո օդակայանում միջադեպ է տեղի ունեցել, երբ եղբայրները հրաժարվել են բացել իրենց պայուսակները եւ զենք են հանել: Միջադեպից հետո եղբայրներն արտաքսվել են Քենիայից առանց հետաքննության, ինչն առաջացրել էր Քենիայի ընդդիմության զայրույթը: Տիկին Ու.Վանգուին, ըստ քենիական մամուլի, երկրի նախագահի երկրորդ՝ ոչ պաշտոնական կինն է: Այժմ էլ մամուլը հաղորդում է, թե նա հայտարարել է Արթուր Մարգարյանի հետ ամուսնանալու մասին: Ի դեպ, եղբայրներն այժմ ապրում են Դուբայում: