2 րոպեի ընթերցում
Իրանի արտաքին գործերի նախարարության խոսնակ Էսմայիլ Բաղային հայտարարել է, որ Թեհրանը թշնամանք չի տածում տարածաշրջանային երկրների նկատմամբ և պատրաստ է համագործակցության՝ հանուն կայուն անվտանգության հաստատման։ «Արմենպրես»-ի փոխանցմամբ՝ այս մասին հայտնում է Al Jazeera-ն։
Այդուհանդերձ, նա ընդգծել է, որ «Իրանը չի կարող լռել, երբ որոշ տարածաշրջանային պետությունների տարածքն օգտագործվում է իր ազգային ինքնիշխանությունը խախտելու կամ իր ժողովրդի անվտանգությունը սպառնալու համար»։
Խոսնակը նաև նշել է, որ Պարսից ծոցի որոշ հարևան երկրներ «չափազանց մեծ հույսեր են կապում ԱՄՆ-ի ռազմական ներկայության հետ և վստահում են նրան, իսկ որոշ դեպքերում՝ նաև ակտիվորեն համագործակցում են նրա հետ»։
«Վստահության կառուցումը երկկողմանի գործընթաց է, և Իրանի ողջամիտ ակնկալիքն այն է, որ տարածաշրջանային երկրները չպետք է թույլ տան, որ իրենց տարածքը կամ կառույցները շահագործվեն խոշոր հարևանի դեմ»,- ընդգծել է Բաղային։
Անդրադառնալով Հորմուզի նեղուցին` նա նշել է, որ նեղուցը չի կարող բացվել, քանի դեռ Իրանի դեմ շրջափակումը շարունակվում է։
«Հորմուզի նեղուցը չի կարող վերաբացվել, քանի դեռ շրջափակումը չի վերացվել և Իրանի պահանջները չեն կատարվել», - հայտարարել է Բաղային՝ հավելելով, որ միայն այդ դեպքում կողմերը կարող են քննարկել դիվանագիտական գործընթացի շարունակությունը։
Բաղային նշել է, որ դիվանագիտական գործընթացը դեռևս ընթացքի մեջ է, և որ բանակցությունները հիմնված են Իրանի յոթ փուլից բաղկացած առաջարկի վրա։