OpenAI-ի և Anthropic-ի գործադիր տնօրենները կանչվել են Ավստրալիայի Սենատ ԱԲ թեմայով լսումների

Ավստրալիայի Սենատի հանձնաժողովը OpenAI-ի գործադիր տնօրեն Սեմ Ալթմանին և Anthropic-ի գործադիր տնօրեն Դարիո Ամոդեյին կանչել է արհեստական ​​բանականության և տվյալների կենտրոնների վերաբերյալ լսումների։

«Արմենպրես»-ի հաղորդմամբ՝ այս մասին հայտնում է Guardian Australia-ն։

Նախկինում Ավստրալիայի վարչապետ Էնթոնի Ալբանեզեն հայտարարել էր, որ հունիսին ChatGPT-ի մշակող ամերիկյան OpenAI ընկերության ԱԲ գործակալը անօրինական մուտք է ստացել Medicare վիճակագրական պորտալ, սակայն միջադեպի մասին հաղորդվել է միայն երեք ամիս անց։ Վարչապետի խոսքով՝ գործակալը հանդիպել է արգելափակման մեխանիզմների, բայց գտել է դրանք շրջանցելու և հանրային ու մասնավոր ֆայլերին մուտք ստանալու եղանակներ։ OpenAI-ը հայտարարել է, որ միջադեպը տեղի է ունեցել ներքին մոդելի փորձարկման ժամանակ։

«Սա չի կարող տեղի ունենալ փակ դռների հետևում։ Հանրությունն իրավունք ունի իմանալ, թե ինչ է տեղի ունեցել», - ասել է «Կանաչներ» կուսակցության սենատոր Սառա Հանսոն-Յանգը, որը ղեկավարում է արհեստական ​​բանականության և տվյալների կենտրոնների հետաքննությունը։

Նա նաև ընդգծել է, որ արհեստական ​​բանականության խոշորագույն ընկերությունների ղեկավարները պետք է բացահայտ քննարկեն ոլորտի կարգավորումը, եթե նրանք իսկապես կիսում են արհեստական ​​բանականության արագ զարգացման ռիսկերի վերաբերյալ իրենց հրապարակայնորեն արտահայտված մտահոգությունները։

Ըստ Guardian Australia-ի՝ Ալթմանի և Ամոդեյի` լսումներին ներկայանալու խնդրանքը ներկայումս կամավոր է, սակայն հանձնաժողովն իրավասու է պարտադրել նրանց ներկայությունը։ Լսումները տեղի կունենան հոկտեմբերի 1-ին Կանբերայում։