Գարեգին Բ կաթողիկոսի և 6 եպիսկոպոսների գործի քննությունը կշարունակվի Երևանի առաջին ատյանի քրեական դատարանում

Արմավիրի մարզի առաջին ատյանի ընդհանուր իրավասության քրեական դատարանի դատավոր Սերժ Ռուշանյանը որոշում է կայացրել, համաձայն որի Գարեգին Բ կաթողիկոսի և Գերագույն հոգևոր խորհրդի անդամ վեց եպիսկոպոսների ու արքեպիսկոպոսների վերաբերյալ քրեական գործը պետք է ուղարկվի Երևան քաղաքի առաջին ատյանի ընդհանուր իրավասության քրեական դատարան։

«Արմենպրես»-ի հաղորդմամբ՝ այս մասին լրատվամիջոցների հետ զրույցում հայտնել է փաստաբան Արա Զոհրաբյանը։

Դատավորն իր որոշումը հիմնավորել է նրանով, որ Կաթողիկոսին վերագրվող արարքի մեղադրական ձևակերպումներում հստակեցված չէ հանցագործության կատարման վայրը։

Արա Զոհրաբյանը նշել է, որ մեղադրանքի կողմը միջնորդել է, որ արգելվեն զանգվածային լրատվության միջոցների կողմից դատական նիստի հեռարձակումը, ինչպես նաև դատական նիստն անցկացնել դռնփակ ռեժիմով, սակայն դատավորը մերժել է այդ միջնորդությունը։

«Մենք այսօր ականատես եղանք, որ դատավորը չցանկացավ գործը քննել․ մենք համաձայն չենք դատարանի որոշման հետ, որովհետև կարծում ենք, որ դա ճիշտ չէ»,-ասել է Զոհրաբյանը՝ հավելելով, որ պաշտպանական կողմը մտահոգություն ունի, որ այս գործը կարող է մակագրվել այնպիսի դատավորների, որոնց հանրությունը չի վստահում։

Գարեգին Բ-ին մեղսագրվում է ՀՀ քրեական օրենսգրքի 507-րդ հոդվածի 2-րդ մասով նախատեսված արարք՝ ծառայողական լիազորությունների օգտագործմամբ օրինական ուժի մեջ մտած դատական ակտի կատարմանը խոչընդոտելը։ Նույն մեղադրանքն առաջադրված է նաև Նաթան արքեպիսկոպոս Հովհաննիսյանին, Հայկազուն արքեպիսկոպոս Նաջարյանին, Վահան եպիսկոպոս Հովհաննիսյանին, Մակար եպիսկոպոս Հակոբյանին, Մուշեղ եպիսկոպոս Բաբայանին և Հովնան եպիսկոպոս Հակոբյանին։

Գործը կապված է Մասյացոտնի թեմի նախկին առաջնորդ Գևորգ եպիսկոպոս Սարոյանի պաշտոնավարման վերաբերյալ դատական գործընթացի հետ։ 2026 թվականի հունվարի 10-ին Գարեգին Բ-ի տնօրինությամբ Գևորգ եպիսկոպոս Սարոյանն ազատվել էր թեմակալ առաջնորդի պաշտոնից։ Նա վիճարկել էր որոշումը դատարանում, իսկ դատարանը հայցի ապահովման միջոց էր կիրառել՝ մինչև գործով վերջնական դատական ակտի կայացումը նրա պաշտոնավարումն ապահովելու վերաբերյալ։ Մեղադրող կողմի պնդմամբ՝ հետագայում այդ դատական ակտի կատարումը խոչընդոտվել է։

Փետրվարին Գարեգին Բ կաթողիկոսի նկատմամբ որպես խափանման միջոց կիրառվել էր բացակայելու արգելքը, որի հետևանքով արգելվել էր նրա ելքը Հայաստանից։

Գործով դատական առաջին նիստը կայացել էր օգոստոսի 7-ին։ Այդ նիստին Գարեգին Բ կաթողիկոսը և մյուս մեղադրյալները մասնակցում էին։ Այդ նիստի ընթացքում դատավոր Հակոբ Մանուկյանն ինքնաբացարկ էր հայտնել, ինչի հետևանքով էլ նիստը հետաձգվել էր։