6 րոպեի ընթերցում
«Արմենպրես» լրատվական գործակալության «Երևանյան բեսթսելեր» հեղինակային նախագիծն այս շաբաթ ներկայացնում է մանկական և պատանեկան գեղարվեստական ստեղծագործությունների լավագույն տասնյակը՝ ըստ հուլիսի վաճառքի տվյալների:
Հայկ Աջապահյանի «Իշխանության 48 օրենքները» առաջին տեղում է։ «Իշխանության 48 օրենքները» կիրառվում են առօրյա կյանքում՝ դպրոցական խաղերի, ընկերների հետ վիճաբանությունների, դասարանում գրանցած փոքրիկ հաղթանակների, տանը ծագած խնդիրների ընթացքում: Այս գիրքն օգտագործում է հենց այդ իրական պատմությունները՝ Դավիթի և Անիի կյանքից, որպեսզի երեխաները տեսնեն՝ ինչպիսի ուժ ունի ճիշտ որոշումը: Ամեն օրենք ներկայացված է պարզ, հասկանալի լեզվով, ուղեկցվում է կենդանի պատմություններով ու հետաքրքիր առաջադրանքներով: Այդպես ընթերցանությունը դառնում է ոչ թե պարտադրանք, այլ խաղ, ինքնաճանաչման միջոց:
Երկրորդ հորիզոնականում է «Բոքոնիկը» գիրքը: Բոքոնիկի մասին հեքիաթը հանդիպում է ռուսական և ուկրաինական բանահյուսություններում, ինչպես նաև ունի իր նմանակները շատ ժողովուրդների մոտ: Սյուժեն հանդիպում է նաև սկանդինավյան, գերմանական, ուզբեկական, թաթարական և այլ հեքիաթներում:
«Լավագույն հեքիաթներ․ բժիշկ Այբոլիտը» երրորդն է: Այն պատմություն է հանրահայտ բժշկի մասին, ում սիրում են գրեթե բոլոր երեխաները: Չուկովսկին իր այս հերոսին ներկայացրել է մի շարք հեքիաթներում:
Չորրորդ տեղում է «Շաղգամը» հեքիաթը, որը հայտնի է բոլոր փոքրիկներին: Աթաբեկ Խնկոյանի այս ստեղծագործության ներքո որքա՜ն սերունդներ են մեծացել ու իմաստություն ձեռք բերել:
Հինգերորդ տեղում է Դերենիկ Դեմիրճյանի «Պույ-Պույ Մուկիկը»: Յուրաքանչյուր երեխա մեծ բավականություն կստանա՝ ընթերցելով հեքիաթը հանրահայտ մուկիկի մասին, դե, իսկ սյուժեն հայտնի է բոլոր-բոլորին:
«Մաքսիկ շնիկը» վեցերորդ տեղում է։ Այս գրքում զետեղված են փոքրիկ պատմություններ բոլոր պստիկ-ճստիկների համար, ովքեր նոր նոր են կարդալ սովորում։
Յոթերորդ տեղում է «Շունն ու կատուն» գիրքը։ Այս հեքիաթի սյուժեի մասին կարելի է ընդհանրապես չխոսել, քանի որ այն ծանոթ է յուրաքանչյուր փոքրիկի: Թումանյանական այս հեքիաթը սիրված է շատերի կողմից:
«Լավագույն հեքիաթներ․ Քնած գեղեցկուհին» ութերորդ տեղում է։ Այն հեքիաթ է արքայադստեր մասին, որը կախարդական անեծքի պատճառով քնում է երկար տարիներ, մինչև մի օր արքայազնի համբույրը նրան արթնացնում է։
Լուն Ուշի «Լիլիի կախարդական կոշիկները․ առեղծվածային արհեստանոցը» իններորդ տեղում է։ «Լիլիի կախարդական կոշիկները» մի պատմություն է, որտեղ կախարդանքն սկսվում է հենց առաջին էջից։ Սա գիրք է ընկերության, երազանքների ու փոքրիկ հրաշքների մասին, որը երեխաներին կտանի դեպի գունավոր ու կախարդական մի աշխարհ։
Լևոն Արզումանյանի «Սարդերի թագավորությունը» տասներորդ տեղում է։ Միլենան փոքրիկ աղջնակ է, որը սիրում է երազել: Նա հավատում է, որ աշխարհում կան հրաշքներ, որոնք տեսնում են միայն նրանք, ովքեր պատրաստ են հավատալու դրանց: Բայց ինչ-որ պահի նրա օրերը միապաղաղ են դառնում, ինչը խորապես անհանգստացնում է նրան: Մի երեկո, երբ տատիկը նրան թաքնված աշխարհների մասին հեքիաթ է կարդում, ամեն ինչ փոխվում է: Միլենան հրաշքով հայտնվում է մի զարմանահրաշ աշխարհում՝ սարդերի թագավորությունում՝ հյուսված մետաքսե թելերով և լի իր օրենքներով ու գաղտնիքներով: Այդ աշխարհը խոստանում է ոչ միայն հետաքրքիր արկածներ, այլև պատասխաններ այն հարցերին, որոնք արդեն երկար ժամանակ է, ինչ լուռ ապրում են Միլենայի սրտում: Առջևում նրան սպասվում քառաքյլ անմոռանալի ճամփորդություն՝ լի փորձություններով, բացահայտումներով և անակնկալներով: Բայց ամենակարևորն այն է, որ Միլենան պատրաստ է անցնելու այդ ճանապարհը քեզ հետ:
«Երևանյան բեսթսելերը» ներկայացրեց Ռոզա Գրիգորյանը
Ցանկում ներառված չեն «Երևանյան բեսթսելեր» մրցանակի արժանացած գրքերը
Վարկանիշային ցուցակի կազմման հարցումներին մասնակցել են «Բուկինիստ» (011-53-74-13), «Հայ գիրք-Դարան» (56-80-38), «Զանգակ» (011-22-33-66), «Նոր գրախանութ» ( 044-53-74-74) գրախանութների և գրատների ցանցերը:
| Տեղ | Փոփոխ․ | Գիրք | Հրատ․ | Քանակ | |
| 1 | 0 | Հայկ Աջապահյան, «Իշխանության 48 օրենքները» | Դավինչի | 227 | |
| 2 | * | «Բոքոնիկը» | Բուկինիստ | 76 | |
| 3 | * | «Լավագույն հեքիաթներ․ բժիշկ Այբոլիտը» | Դավինչի | 76 | |
| 4 | +6 | «Շաղգամը» | Բուկինիստ | 71 | |
| 5 | * | Դերենիկ Դեմիրճյան, «Պույ-Պույ Մուկիկը» | Բուկինիստ | 71 | |
| 6 | * | «Մաքսիկ շնիկը» | Անտարես | 71 | |
| 7 | * | «Շունն ու կատուն» | Բուկինիստ | 66 | |
| 8 | * | «Լավագույն հեքիաթներ․ Քնած գեղեցկուհին» | Դավինչի | 62 | |
| 9 | -2 | Լուն Ուշ, «Լիլիի կախարդական կոշիկները․ առեղծվածային արհեստանոցը» | Դավինչի | 58 | |
| 10 | Նոր | Լևոն Արզումանյան, «Սարդերի թագավորությունը» | Դավինչի | 44 |