Հարավային Կորեայում պատրաստվում են ռեկորդային բարձր ջերմաստիճանի

Հարավային Կորեայում շոգի ալիքը, ըստ կանխատեսումների, օգոստոսի 6-ին Սեուլի շրջանում կհասնի իր գագաթնակետին․ այստեղ ջերմաստիճանը կարող է հասնել 39 աստիճանի ըստ Ցելսիուսի։ Ինչպես հաղորդում է «Արմենպրես»-ը, այս մասին հայտնում է Reuters-ը՝ նշելով, որ ծայրահեղ շոգ եղանակի պատճառով արդեն ավելի քան 20 մարդ է մահացել։

«Ծայրահեղ շոգը, որի նմանը երբեք չենք զգացել, շարունակվում է։ Շոգի ալիքները, որոնք նախկինում տեսնում էինք միայն արտասահմանյան լրատվականների հաղորդումներում, այժմ դարձել են մեր իրականությունը», - օգոստոսի 6-ին՝ շոգի դեմ պայքարի միջոցառմանը հայտարարել է Հարավային Կորեայի նախագահ Լի Ջե Մյոնը։

Նա հանձնարարել է նախարարություններին և տեղական իշխանություններին մոբիլիզացնել բոլոր հասանելի ուժերն ու միջոցները մինչև շոգի թուլանալը՝ կարևորելով մարդկանց կյանքի և անվտանգության պաշտպանությունը, խոցելի խմբերի համար ավելի ուժեղ պաշտպանական միջոցների կիրառումը և բացօթյա աշխատողների համար ամենաշոգ ժամերին հանգստի ընդմիջումների խիստ վերահսկումը։

Կանխատեսվող ջերմաստիճանը Սեուլը կմոտեցնի քաղաքի պատմական ռեկորդին՝ 39,6 աստիճանին, որը գրանցվել էր 2018 թվականի օգոստոսին՝ երկրի վերջին խոշոր շոգի ալիքի ժամանակ։

Կորեայի օդերևութաբանական վարչության (KMA) տվյալներով՝ որոշ թաղամասերում նախորդ գիշերվա ընթացքում ջերմաստիճանը հազիվ է իջել 30 աստիճանից ցածր։

Կորեայի բեյսբոլի կազմակերպությունը չեղարկել է այս օրերին նախատեսված խաղերը՝ այն բանից հետո, երբ շոգի պատճառով որոշ երկրպագուներ ուշագնաց են եղել։