2 րոպեի ընթերցում
Հյուսիսային Կորեայի ռազմական գործունեությունն առաջվա պես առաջացնում է Տոկիոյի լուրջ մտահոգությունները. Ճապոնիայում կարծում են, որ Փհենյանը երկրին միջուկային հարված հասցնելու հնարավորություն ունի: Ինչպես «Արմենպրես»-ը տեղեկանում է «Ինտերֆաքս» գործակալությունից, այդ մասին վկայում է Ճապոնիայի պաշտպանության նախարարության 2026 թվականի «Պաշտպանության սպիտակ գիրքը» ամենամյա զեկույցը։
«Հյուսիսային Կորեայի ռազմական գործունեությունը Ճապոնիայի ազգային անվտանգության համար ավելի լուրջ և անմիջական սպառնալիք է, քան երբևէ նախկինում», - ասվում է զեկույցում։
Նշվում է, որ ԿԺԴՀ-ի գործողությունները լրջորեն խաթարում են «տարածաշրջանի և միջազգային հանրության խաղաղությունն ու անվտանգությունը»։
«Հյուսիսային Կորեան իրականացրել է միջուկային վեց փորձարկում և, ինչպես ենթադրվում է, ունի տեխնոլոգիական հնարավորություններ՝ իր բալիստիկ հրթիռների վրա միջուկային մարտագլխիկ տեղադրելու համար։ Այդ հրթիռների հեռահարությունը ներառում է Ճապոնական կղզեխումբը և հնարավորություն է տալիս հարված հասցնել Ճապոնիային», - հայտարարել են Ճապոնիայի պաշտպանության նախարարությունում։
Ճապոնիայի պաշտպանության նախարարության տվյալներով՝ Փհենյանը շարունակում է չափազանց արագ տեմպերով մշակել բալիստիկ և գերձայնային հրթիռներ, ինչպես նաև ձգտում է շահագործման հանձնել մեծ հեռահարության թևավոր հրթիռներ, որոնք նախատեսված են միջուկային մարտագլխիկներ կրելու համար։
Բացի այդ, Տոկիոյին անհանգստացնում է ԿԺԴՀ-ի համագործակցությունը Ռուսաստանի հետ։
«Կա վտանգ, որ Հյուսիսային Կորեայի զինված ուժերը միջնաժամկետ և երկարաժամկետ հեռանկարում կարող են հզորացվել Ռուսաստանի հետ ռազմական համագործակցության հաշվին, ինչը լուրջ մտահոգություն է առաջացնում Ճապոնիային շրջապատող տարածաշրջանի անվտանգության տեսանկյունից», - նշել են Ճապոնիայի պաշտպանության նախարարությունում։