Գերմանիայի ԱԳ նախարարն առաջարկել է Լիբանանում ՄԱԿ-ի ժամանակավոր ուժերը փոխարինել ԵՄ առաքելությամբ

Գերմանիայի արտաքին գործերի նախարար Յոհան Վադեֆուլն առաջարկել է ստեղծել ԵՄ առաքելություն՝ Լիբանանում ՄԱԿ-ի Ժամանակավոր ուժերի դուրսբերումից հետո դրանք փոխարինելու համար։ «Արմենպրես»-ի փոխանցմամբ՝ այս մասին նա ասել է RND խմբագրական միավորման հետ հարցազրույցում։

«Մենք ԵՄ-ում պետք է ուսումնասիրենք՝ արդյոք չենք կարող Ժամանակավոր ուժերի մանդատի ժամկետը լրանալուց հետո  եվրոպական մանդատի շրջանակներում հոգ տանել, որ չառաջանա անվտանգության վակուում», - ասել է նախարարը:

Վադեֆուլը նշել է, որ ԵՄ առաքելությունն Իսրայելին թույլ կտա դուրս բերել իր ուժերը Լիբանանից՝ առանց վախենալու, որ «Հեզբոլլահ» շարժումը կվերադառնա։

Վադեֆուլը կարծում է, որ Լիբանանում ստեղծված իրադրությունը թույլ է տալիս իրադարձությունների դրական զարգացման հույս ունենալ։

«Մենք՝ եվրոպացիներս, պետք է անենք ամեն ինչ, որպեսզի այդ գործընթացը շարունակվի դրական ուղղությամբ», - հայտարարել է Գերմանիայի արտաքին գործերի նախարարը։

Լիբանանում խաղաղապահ առաքելությունն ստեղծվել է 1978 թվականին երկիր Իսրայելի ներխուժումից հետո՝ ՄԱԿ-ի Անվտանգության խորհրդի բանաձևին համապատասխան։ Դրա մանդատը երկարաձգվում է յուրաքանչյուր կես տարին մեկ։ 2025 թ. օգոստոսի վերջին Ժամանակավոր ուժերի մանդատի գործողության ժամկետը երկարաձգվել է վերջին անգամ՝ մինչև 2026 թ. դեկտեմբերի 31-ը. որոշվել է սկսել Լիբանանի հարավում այդ ուժերի թվաքանակի կանոնավոր և անվտանգ կրճատում և դուրսբերում մինչև 2027 թվականը։ Այժմ խաղաղապահ զորակազմի թվաքանակը  գերազանցում է 8000-ը։ Դրա կազմում են զինծառայողներ 47 երկրից: