«Ուժեղ Հայաստան» դաշինքը խոստանում է հանդես գալ խորքային հայտարարությամբ բոլոր հաշվարկների ավարտից հետո

«Ուժեղ Հայաստան» դաշինքի ընտրական ցուցակը գլխավորող Նարեկ Կարապետյանը խոստանում է խորքային հայտարարություն անել խորհրդարանական ընտրությունների քվեարկության արդյունքների վերաբերյալ  բոլոր հաշվարկների ավարտից հետո։

«Արմենպրես»-ի հաղորդմամբ՝ այս մասին Նարեկ Կարապետյանը հայտարարել է «Ֆեյսբուք»-ի իր էջում հրապարակած տեսանյութում՝ դիմելով իրենց քաղաքական ուժի համակիրներին ու անդամներին։

«Մենք հանդես կգանք խորքային հայտարարությամբ, երբ իրապես ավարտված լինեն հաշվետվություններն ու հաշվարկները»,-ասել է Կարապետյանը։

Կարապետյանը նաև շնորհակալություն է հայտնել իրենց օգտին քվեարկած հարյուր հազարավոր մարդկանց։

Հայաստանում կայացած խորհրդարանական ընտրությունների նախնական արդյունքներով խորհրդարան մտնելու անցողիկ շեմը հաղթահարել է երեք քաղաքական ուժ՝ «Քաղաքացիական պայմանագիր» կուսակցությունը՝ 727 հազար 160 կամ 49,825 տոկոս ձայներով, «Ուժեղ Հայաստան» դաշինքը՝ 340 հազար 88 կամ 23,281 տոկոս ձայներով, «Հայաստան» դաշինք՝ 145 հազար 113 կամ 9,934 տոկոս ձայներով։  «Քաղաքացիական պայմանագիր» կուսակցությունը քվեարկության նախնական արդյունքներով կկարողանա մեծամասնություն ստանալ խորհրդարանում և ձևավորել կառավարություն։