2 րոպեի ընթերցում
ՀՀ Ներքին գործերի նախարարության Միգրացիայի և քաղաքացիության ծառայության պետ Նելլի Դավթյանը հերքեց հրապարակումներն այն մասին, թե Երևան քաղաքի Էրեբունի վարչական շրջանի Սուվորովի փողոցի տուն 82 հասցեում Թուրքիայի Հանրապետության որևէ քաղաքացի է հաշվառված։
Հասցեի սեփականատեր ներկայացող անձը հայտարարել էր, որ իր տանը հաշվառված Նանոր Յարությունի Քրտան Օղլի անուն-ազգանունով անձը Թուրքիայի քաղաքացի է։
«Եթե կա ցուցակներում, ապա, բնականաբար, Հայաստանի Հանրապետության քաղաքացի է, կարող է ունենալ նաև այլ պետության քաղաքացիություն, որը, հստակ արձանագրեմ, Թուրքիայի քաղաքացիությունը չէ։ Տվյալ բնակելի տարածքի սեփականատերը և այն անձը, ով նման հրապարակում էր արել, հրավիրվել են Միգրացիայի և քաղաքացիության ծառայություն՝ պարզաբանումների և հաշվառման հիմքերը քննարկելու»,-«Արմենպրես»-ի հաղորդմամբ՝ ընդգծեց Դավթյանը՝ փաստելով, որ հաշվառման հիմքերը միանգամայն իրավաչափ են։
ՆԳՆ Միգրացիայի և քաղաքացիության ծառայության պետը ևս մեկ անգամ ընդգծեց՝ Ազգային ժողովի ընտրությունների ընտրացուցակում կարող են ընդգրկվել բացառապես Հայաստանի Հանրապետության քաղաքացիները։ Իսկ նշված հասցեում հաշվառված անձանց, ինչպես նաև հաշվառման վերաբերյալ տեղեկատվություն ստանալու համար անհրաժեշտ է ներկայացնել սեփականության իրավունքը հավաստող փաստաթուղթ։
ՆԳ նախարարությունն իր հերթին հորդորում է չտարածել մանիպուլյացնող տեղեկություններ և հրապարակել միայն ճշտված տեղեկատվություն։