«Լուսավոր Հայաստան»-ը վստահ է, որ լինելու է խորհրդարանում

«Լուսավոր Հայաստան»-ը հունիսի 7-ին Հայաստանում կայանալիք խորհրդանշական ընտրությունների նախընտրական քարոզարշավի հերթական օրն անցկացրել է Կառավարության շենքի դիմաց։

«Արմենպրես»-ի հաղորդմամբ՝ կուսակցության ընտրական ցուցակը գլխավորող Էդմոն Մարուքյանը վստահեցրեց, որ իր գլխավորած  քաղաքական ուժի ուղերձները տեղ են հասել, և իրենք  հանրահավաքներ անելու կարիք չունեն։

«Ընտրողը չի ընտրում քաղաքական ուժին նրա համար, որ Հանրապետության հրապարակում կամ Օպերայում հանրահավաք են անում։ Այսօր մարդը չի գնում հանրահավաքի, որ իմանա ընդդիմադիր առաջնորդն ինչ է ասում, դա նախկինում էր, այսօր բոլորն օնլայն են հետևում»,-ասաց նա։

Մարուքյանը քարոզարշավը անհավասար գնահատեց, սակայն նշեց, որ ապշած է կուսակցության մարզային և քաղաքական հանդիպումների ժամանակ մարդկանց դրական և ջերմ վերաբերմունքից։

«Մենք լինելու ենք խորհրդարանում։ Մեկ անձի իշխանության վերջը հունիսի 7-ին ժողովուրդը տալու է»,-հավելեց նա՝ կոչ անելով մարդկանց  գնալ ընտրատեղամասեր, վերցնել 19 համարի քվեաթերթիկը և բացառել մեկ ուժի իշխանությունը Հայաստանում։

«Բազմաթիվ կուսակցությունների խորհրդարան պետք է ձևավորվի, որտեղ կլինի հաշվետու իշխանություն և որը կծառայի Հայաստանի ժողովրդին»,-եզրափակեց Էդմոն Մարուքյանը։

Մայիսի 8-ին մեկնարկել է հունիսի 7-ին Հայաստանում կայանալիք խորհրդարանական ընտրությունների նախընտրական քարոզարշավը, որը կշարունակվի մինչև հունիսի 5-ը։

Ընտրություններին մասնակցելու համար գրանցվել է 18 քաղաքական ուժ՝ 2 դաշինք և 16 կուսակցություն։ «Լուսավոր Հայաստան» կուսակցությունը ընտրություններին մասնակցում է 19 համարի ներքո։ Կուսակցության կարգախոսն է՝ «Պաշտպանիր ինքնությունդ»։  

Կուսակցությունը ԿԸՀ է ներկայացրել 89 թեկնածուից բաղկացած ընտրական ցուցակ, որը գլխավորում է կուսակցության նախագահ, ԱԺ նախկին պատգամավոր Էդմոն Մարուքյանը։